ചെമ്മനം കവിതകളിലെ ഉപഹാസം

ഡോ. ആഷപുല്ലാട്ട് 

സംഗ്രഹം

മനുഷ്യനോടൊപ്പം പിറക്കുന്ന സഹജഭാവങ്ങളാണ്ചിരിയും കരച്ചിലും.വേദന അകറ്റി ആനന്ദം കൈവരുത്തുകയാണ് ജീവിതലക്ഷ്യം. അതിനാൽ ഹാസ്യത്തിന് സാഹിത്യത്തിൽ ജീവിതത്തിൽ പരമ പ്രാധാന്യമുണ്ട്കുഞ്ചൻ നമ്പ്യാർക്ക് സമാനനായിഹാസ്യ സാഹിത്യത്തിൽ പരിഗണിക്കപ്പെടുന്ന ഒരു കവിയാണ് ചെമ്മനം ചാക്കോ.സാമൂഹിക പ്രശ്നങ്ങളുടെ യാഥാർത്ഥ്യം കണ്ടെത്തി ഹാസ്യത്തിന്റെ മാധ്യമത്തിൽ അവതരിപ്പിച്ച വായനക്കാരിൽ ആഘാതം ഏൽപ്പിക്കുന്ന വിമർശ സാഹിത്യകാരനായ ചെമ്മനത്തിന്റെ കവിതകളിലെ ഉപഹാസപാരമ്പര്യം അന്വേഷിക്കുകയാണ് ഈ ലേഖനം .

താക്കോൽ വാക്കുകൾ

ഉപഹാസം,ഹാസ്യ സാഹിത്യം,സ്ഥായിഭാവം

              മനുഷ്യൻറെ രണ്ട് സഹജഭാവങ്ങളാണ് ചിരിയും കരച്ചിലും . ചിരി ആനന്ദം പ്രദാനം ചെയ്യുമ്പോൾ കരച്ചിൽ വേദനയുടെ ലക്ഷണമാണ്. വേദന മാറ്റി ആനന്ദം കൈവരുത്തുകയാണ് ജീവിതലക്ഷ്യം.ആനന്ദത്തിന്റെ ലക്ഷണമായ ഹാസത്തിന് മനുഷ്യജീവിത ചരിത്രത്തോളം പഴക്കമുണ്ട് .ലോകത്തിൻറെ വ്യത്യസ്ത ഭാഗങ്ങളിൽ വ്യത്യസ്ത കാലഘട്ടങ്ങളിൽ ജീവിച്ചിരുന്ന മനുഷ്യരുടെ രസവാസനകൾക്കും ചിന്താ സ്വരൂപങ്ങൾക്കും സംസ്കാരത്തിന് അനുസരിച്ചുള്ള ഹാസമായിരിക്കും അവരുടെ ഇടയിൽ ഉടലെടുത്തിരിക്കുക.

       സുന്ദരകലകളിൽ എന്നപോലെ മന:ശാസ്ത്രത്തിലും അതിപ്രധാനമായ ഒരു സ്ഥാനം വഹിക്കുന്ന വിഷയമാണ് ഹാസ്യം മനുഷ്യനോടൊപ്പം പിറക്കുന്ന സഹജമായ ഭാവങ്ങളാണ് ചിരിയും കരച്ചിലും .ചിരി പ്രീതിയുടെയും ആനന്ദത്തിന്റെയും ലക്ഷണമാ ണെങ്കിൽ കരച്ചിൽ അപ്രീതിയുടെയും വേദനയുടെയും ലക്ഷണമായിട്ടാണ് മനുഷ്യരിൽ പ്രത്യക്ഷപ്പെടുന്നത്. വേദന മാറ്റി ആനന്ദം കൈവരുത്തുകയാണ് ജീവിതലക്ഷ്യം. ആനന്ദത്തിന്റെ ലക്ഷണമായ ചിരിക്ക് അഥവാ ഹാസ്യത്തിന് ജീവിതത്തിൽ പരമ പ്രാധാന്യമുണ്ട്. ഹാസ്യത്തിന് പ്രേരകമായ മനോഭാവങ്ങൾ വിഭിന്നങ്ങളും അനവധിയുമാണ് എതിരാളിയെ കൊമ്പുകുത്തിച്ച ജേതാവിന്റെ ഹാസ്യം, ദുർവൃത്തനെ നിന്ദിച്ചുകൊണ്ടുള്ള സഹൃദയന്റെ ഹാസ്യം, ഇച്ഛിച്ചത് ലഭിക്കുമ്പോഴുള്ള സംതൃപ്തിയുടെ ഹാസ്യം, ഇഷ്ടജന സമാഗമത്തിൽ ഉള്ള ഹാസ്യം,  കളികളിലും വിനോദ അവസരങ്ങളിലും പ്രായഭേദമെന്യേപ്രകടിപ്പിക്കുന്ന ഹാസ്യം,  മറ്റുള്ളവരുടെ വിജയത്തിൽ അവരെ അഭിനന്ദിക്കുമ്പോൾ ഉണ്ടാകുന്ന ഹാസ്യം,  സാഹിത്യകൃതികളിലൂടെ കടന്നുപോകുമ്പോൾ സഹൃദയർ ക്കുണ്ടാകുന്ന ഹാസ്യം,  ചിന്തകന്മാരും മഹാന്മാരും അജ്ഞാത ശക്തിയുടെ ലീലാവിലാസം കണ്ട് ഊറിച്ചിരിക്കുന്ന ഹാസ്യം, ഇങ്ങനെ ഹാസ്യം വ്യത്യസ്തവും നാനാമുഖവുമാണ്. അതുകൊണ്ടാണ് ഹ്യൂമർ എന്ന പദം നിർവചനക്ഷമം അല്ലെന്ന്  പ്രസിദ്ധ ആംഗലേയ ചിന്തകനായ  ജി.കെ ചെസ്റ്റേർട്ടൺ (1) അഭിപ്രായപ്പെട്ടിരിക്കുന്നത്.

                      ഹാസ്യം ആവിർഭവിക്കുന്ന രീതികളും ഹസിക്കപ്പെടുന്ന വിഷയങ്ങളും കാലദേശങ്ങളിലെ മനുഷ്യരുടെ രസവാസനകളെയും ചിന്താസ്വരൂപത്തെയും സംസ്കാരത്തെയും വ്യക്തമാക്കുന്നു. ഒരു ജനസമൂഹത്തിന്റെ പല ഘട്ടങ്ങളിലുള്ള ചിരിയുടെ സ്വഭാവം പരിശോധിച്ചാൽ അതാത് കാലത്ത് ഏത് തരത്തിലുള്ള മാനസിക സംസ്കാരമാണ് ആ ജനതയ്ക്ക് ഉണ്ടായിരുന്നതെന്ന് നിഗമിക്കുവാൻ കഴിയും. ഹാസ്യം സഹജമായ ഒരു ഭാവത്തിന്റെ സ്ഫുരണമാണ്. എല്ലാ മനുഷ്യരിലും ഹാസ്യം ഒരു സ്ഥായിഭാവമായി ലഭിച്ചിരിക്കുന്നു. തക്കതായ സന്ദർഭം വരുമ്പോൾ അത് ഉദീപ്തമാവുകയും രസ പദവിയിലേയ്ക്കുയർന്ന് ഹാസ്യരസമായിത്തീരുകയും ചെയ്യുന്നു.

                         കുഞ്ചൻ നമ്പ്യാർക്ക് സമാനനായി മലയാള ഹാസ്യ സാഹിത്യത്തിന്റെ ഔന്നത്യത്തിൽ എത്തിക്കഴിഞ്ഞ ഒരു കവിയാണ് ചെമ്മനം ചാക്കോ. ലോകത്തോടും മനുഷ്യരോടും ബന്ധുക്കളോടും സുഹൃത്തുക്കളോടും എല്ലാം പുലർത്തേണ്ട ബന്ധങ്ങളെയും തന്റെ ജീവിതലക്ഷ്യങ്ങളെയും കവിതയിലൂടെ, ഹാസ്യത്തിലൂടെ കണ്ടെത്തുന്ന കവിയാണ് ചെമ്മനം. കവിതയിൽ സൂചിപ്പിക്കുന്ന ഒട്ടുമിക്ക സന്ദർഭങ്ങളും അദ്ദേഹം ആനുഭാവികമായും പ്രായോഗികമായും നേരിട്ടത് തന്നെയാണ്. തൻ്റെ ലക്ഷ്യപ്രാപ്തിക്കായി ചില നിർണ്ണായക ഘട്ടങ്ങളിൽ കരുതലോടുകൂടി തീരുമാനങ്ങൾ എടുത്ത് അവ പ്രായോഗികമാക്കുന്നതിൽ നമ്പ്യാരെ പോലെ അദ്ദേഹം വിജയിച്ചിരിക്കുന്നു. സാമൂഹിക പ്രശ്നങ്ങളുടെ യാഥാർത്ഥ്യം കണ്ടെത്തി ഹാസ്യത്തിന്റെ മാധ്യമത്തിൽ അവതരിപ്പിച്ച് വായനക്കാരിൽ അവയുടെ ആഘാതം ഏൽപ്പിക്കുന്ന വിമർശഹാസ്യ കവിതകളാണ് അദ്ദേഹത്തിൻ്റേത്.

ഹാസ്യ പാരമ്പര്യം.

            ഒരിക്കലും അസഹ്യമാകാത്ത കാലാവസ്ഥ , അനുകൂലമായ ഭൂപ്രകൃതി, നരകയാതനകളോ ഭീതിതമായ അസ്തിത്വ പ്രശ്നങ്ങളോ അഭിമുഖീകരിച്ചിട്ടില്ലാത്ത ദേശചരിത്രം,  പരസ്പരാശ്രയത്വം വളരെ ചുരുങ്ങിയ സാമൂഹികജീവിതം എന്നിവ കാരണം സുഖലോലുപരായ ഒരു ജനതയായി കേരളീയർ അതിഭാവുകത്വമോ അമിതാവേശമോ കൂടാതെ ലേശം നിസ്സംഗതയോടെ തന്നെ ജീവിതത്തെ സമീപിക്കാനുള്ള വാസന മലയാളിയുടെ സവിശേഷതയാണ്.

ഹാസ്യം ഇതിഹാസ പുരാണങ്ങളിൽ         

                ആർഷസാഹിത്യത്തിലെ ഹാസ്യപ്രഭാവത്തെ കുറിച്ചുള്ള വിചിന്തനം പുരാണേതിഹാസങ്ങളിൽ നിന്നാണ് ആരംഭിക്കേണ്ടത്. ജീവിതത്തിലെ ഏത് കാര്യത്തിനും ഗൗരവപൂർണമായ ഒരു വശവും ഹാസ്യാത്മകമായ മറുവശവും ഉണ്ടെന്ന് ബോധ്യപ്പെടുത്തുന്നതാണ് മഹാഭാരതം. രാമായണത്തിലും ഹാസ്യമുഹൂർത്തങ്ങൾ ധാരാളമുണ്ട്. രാക്ഷസൻമാരുടെയും വാനരന്മാരുടെയും വർണ്ണനകളും അവയ്ക്ക് മനുഷ്യപ്രവർത്തികളോടുള്ള സാദൃശ്യവും ഹാസ്യം ജനിപ്പിക്കുന്നു. ഇതിഹാസങ്ങളിൽ കാണുന്ന ഹാസ്യം മനുഷ്യനെ പൊട്ടിച്ചിരിപ്പിക്കുന്നതല്ല മറിച്ച് ധർമ്മചിന്തയിലേക്ക് നയിക്കുന്നതാണ്.

ഹാസ്യം പഴഞ്ചൊല്ലുകളിൽ

         ജനസഞ്ചയത്തിന്റെ പ്രായോഗിക വിജ്ഞാനമാണ് പഴഞ്ചൊല്ലുകളിൽ കാണുന്നത്. ചില വ്യക്തികളുടെയോ സമൂഹത്തിന്റെയോ സ്വഭാവസവിശേഷതകളെ രസകരമായ സൂചനകളിലൂടെ പഴഞ്ചൊല്ലുകളിലൂടെ ആവിഷ്കരിക്കുന്നു. വ്യക്തികളുടെ ആന്തരവും അത്യന്തഗോപ്യവും സൂക്ഷ്മവുമായ സ്വഭാവ വൈകൃതങ്ങളും വികാരവിചാരങ്ങളും വളരെ പരിഹാസാത്മകമായി പഴഞ്ചൊല്ലുകളിൽ അവതരിപ്പിക്കപ്പെടുന്നു. ഐതിഹ്യങ്ങളിലും ഹാസ്യത്തിന്റെ അടയാളങ്ങൾ കണ്ടെത്താം.  ഉന്നതവും ദാർശനികവുമായ ഹാസ്യം ഉൾക്കൊള്ളുന്ന ഐതിഹ്യങ്ങളും നമുക്കുണ്ട്. വൈവിധ്യപൂർണ്ണമായ ആഖ്യാനക്രമങ്ങളിലൂടെ രൂപം കൊള്ളുന്ന വ്യത്യസ്ത നിലവാരത്തിലുള്ള ചിരികൾ കൊണ്ട് സമ്പന്നമാണ് ഐതിഹ്യങ്ങൾ.

ഹാസ്യം ചാക്യാർ കലകളിൽ

             അതി പ്രാചീനകാലം മുതൽക്ക് തന്നെ കേരളീയ കലാകാരന്മാർ ഹാസ്യപ്രിയർ ആയിരുന്നു. പ്രാധാന്യം ഹാസ്യത്തിനാണ് എന്നു തെളിയിക്കുന്ന കലകളാണ് കൂത്തും കൂടിയാട്ടവും. സഭാവാസികളെ കഥാപാത്രങ്ങളായി സങ്കൽപ്പിച്ച് സന്ദർഭം ഹാസ്യാത്മകമായി പരിഹസിക്കുന്ന ചാക്കിയാർ അവസരം കിട്ടിയാൽ ഉചിതമായ കഥകളും ഉപകഥകളും കൽപ്പിച്ചുണ്ടാക്കി സദസ്യരെ രസിപ്പിക്കാൻ മിടുക്കുള്ളവനാണ്. എത്ര നിസ്സാരമായ വിഷയങ്ങളെയും വർണിച്ചു പെരുപ്പിക്കാനുള്ള വിദ്യ ചാക്യാർക്ക് സ്വതസിദ്ധമാണ്.  ഹാസ്യപ്രയോഗങ്ങൾ കൊണ്ടും ഉച്ചാരണത്തിലെ പ്രത്യേകത കൊണ്ടും ശ്ളേഷോക്തി കൊണ്ടും

പലപ്പോഴും ശബ്ദനിഷ്o ഫലിതം സൃഷ്ടിക്കുന്നവയാണ് കൂത്ത്. വ്യക്തിപരിഹാസത്തിനപ്പുറം രാഷ്ട്രീയവും സാമൂഹികവും സാംസ്കാരികവുമായ ആനുകാലികാവസ്ഥ കൂടി വിമർശനവിധേയമാക്കാൻ ചാക്യാന്മാർ ശ്രദ്ധിച്ചിരുന്നു       

             ചാക്യാർകൂത്തിനോട് വളരെയധികം സാദൃശ്യമുള്ള ഒരുതരം കഥാപ്രസംഗമാണ് പാഠകം. നമ്പ്യാന്മാരുടെ കലയായ പാഠകത്തിലും ഹാസ്യപ്രയോഗങ്ങൾ ധാരാളമുണ്ട്.

തോലകവിയും ഫലിത സാഹിത്യവും 

        വരേണ്യ ഭാഷയായ സംസ്കൃതത്തിന്റെ നിയതമായ അർത്ഥങ്ങളെ വക്രീകരണത്തിലൂടെ യുക്തിപൂർവ്വം മറ്റൊന്നാക്കി തീർക്കുന്ന ഫലിതമാണ് തോലൻ്റേത് .കൂടിയാട്ടത്തിൽ നായകൻ ചൊല്ലുന്ന ശ്ലോകങ്ങൾക്ക് പ്രതിശ്ലോകങ്ങൾ രചിച്ചുകൊണ്ടാണ് തോലൻ മലയാളത്തിലെ ഹാസ്യസാഹിത്യത്തിന് അടിസ്ഥാനമിട്ടത്. ഒരാവിഷ്കരണ ഉപാധി എന്ന നിലയിൽ ഹാസ്യത്തിന്റെ കരുത്ത് തോലകവി പൂർണമായി ഉൾക്കൊണ്ടിരുന്നു.

ഹാസ്യം പ്രാചീന മധ്യകാല മണിപ്രവാള സാഹിത്യത്തിൽ

              സമൂഹത്തിന്റെ ഉപരിതലത്തിലെ കർമ്മ നിരതരല്ലാത്ത നർമ്മപൂരിതമായ ഒരു വിഭാഗത്തിൻ്റെ  ഉപരിപ്ലവമായ ജീവിതത്തെ നിറഞ്ഞ ഫലിതത്തോ ടെ അവതരിപ്പിക്കുന്നവയാണ് പ്രാചീന മണിപ്രവാള കൃതികൾ. ഉണ്ണിയാടി, ഉണ്ണിയച്ചി, ഉണ്ണിച്ചിരുതേവീ ചരിതങ്ങളിൽ    വേശ്യാഗൃഹങ്ങളെ സ്വർഗ്ഗമായി കരുതുന്ന ആഢ്യ കുലജാതരായ വിടോത്തമന്മാരുടെയും സ്ത്രീലമ്പടന്മാരായ പ്രമാണികളുടെയും നേർക്ക് പരിഹാസം അയക്കുന്നത് കാണാം .ചന്ദ്രോത്സവം വാരാംഗന വർണ്ണന തൊഴിലാക്കിയ മണിപ്രവാള കവികളെയും സ്ത്രീ സേവ തൊഴിലാക്കിയ മേലാള വർഗ്ഗത്തെയും വേശ്യാവൃത്തി തൊഴിലാക്കിയ ദേവദാസികളെയും അടച്ചാക്ഷേപിക്കുന്ന ഒരുപഹാസ കൃതിയാണെന്ന് കാണാം.

കൃഷ്ണഗാഥയിലെ ഹാസ്യം 

         ശൃംഗാരത്തിൻ്റ മറപറ്റി നിൽക്കുന്ന ഹാസ്യമാണ് കൃഷ്ണഗാഥയിൽ ഉള്ളത്. ഒരു പദത്തെയോ വാക്യരചനയെയോ ആസ്പദമാക്കിയല്ല ഒരു സ്ഥിതിവിശേഷം സൃഷ്ടിച്ചാണ് ചെറുശ്ശേരി വായനക്കാരെ രസിപ്പിക്കുന്നത്.

നമ്പ്യാരും ഹാസ്യവും 

     നമ്പ്യാരുടെ ഹാസ്യത്തിന്റെ ഉറവിടം കേരളമാണ്.  തുള്ളൽ കഥകളെ തുള്ളൽ കവിതകൾ ആക്കിയത് അവയിലെ ഹാസ്യമാണ്.  കഥാപാത്രങ്ങളെ അദ്ദേഹം കേരളീയവൽക്കരിച്ചു കുഞ്ചൻ നമ്പ്യാർക്ക് ശേഷമുള്ള ഹാസ്യ പ്രതിഭകൾ കൂടുതലും ഗദ്യത്തിലാണ് വിവരിച്ചത്.  ഇ.വി.കൃഷ്ണപിള്ളയും സഞ്ചയനും ഒക്കെ ഗദ്യരീതിയിലൂടെ ഹാസ്യപാരമ്പര്യം പിന്തുടരുന്നവരാണ്. സ്വാതന്ത്ര്യാനന്തര കാലഘട്ടത്തിൽ ഹാസ്യത്തെ സമർത്ഥമായി കവിതയിൽ അവതരിപ്പിച്ച ഒരേ ഒരാൾ ചെമ്മനം ചാക്കോയാണ്. 

                 ചെമ്മനത്തിന്റെ ആദ്യകാല കവിതകളിൽ ദേശീയതയുടെയും കാല്പനികതയുടെയും പുരോഗതിയുടെയും ഉച്ചനാദങ്ങൾ കേൾക്കാം.  പിന്നീട് വന്ന കവിതകളിലെല്ലാം ലോക പരിവർത്തനത്തിനുള്ള ആഹ്വാനം അതിൽ മുഴങ്ങിനിന്നു.  സാമൂഹിക പ്രശ്നങ്ങളുടെ യാഥാർത്ഥ്യം കണ്ടെത്തി ഹാസ്യത്തിന്റെ മാധ്യമത്തിൽ അവതരിപ്പിച്ച് വായനക്കാരിൽ അവയുടെ ആഘാതം ഏൽപ്പിക്കുന്ന കവിതയാണ് ചെമ്മനത്തിന്റേത്. ഓരോ കവിതയും ബോധപൂർവ്വം തീരുമാനിച്ച് രൂപപ്പെടുത്തി എടുത്ത് വിമർശനാത്മകമായ ഹാസ്യം സമൂഹത്തിന് നേരെ തൊടുത്തുവിട്ട് മനുഷ്യ മനസ്സിനെയും സമൂഹ മനസ്സാക്ഷിയെയും നേർവഴിയിലേക്ക് നയിക്കുകയാണ് ചെമ്മനം കവിതകൾ.

               സ്വാതന്ത്ര്യ പ്രാപ്തിയ്ക്കു ശേ ഷം സ്വാർത്ഥ താല്പര്യങ്ങളുടെയും അധികാര പ്രവണതയുടെയും കുത്തൊഴുക്കിൽപ്പെട്ട് ആദർശങ്ങൾ നഷ്ടപ്പെട്ട ഒരു ജനതയായി ഭാരതീയർ മാറിക്കഴിഞ്ഞിരുന്നു.  സ്ഥാപിത താല്പര്യങ്ങളും പക്ഷപാതവും ക്രൂരതയും വഞ്ചനയും തരംതാണ ജാതിസ്പർദ്ധയും അനിയന്ത്രിതമായി വളർന്നുകൊണ്ടിരുന്നു.  ത്യാഗത്തിന്റെയും ഐക്യത്തിന്റെയും നീതിബോധത്തിന്റെയും എല്ലാം വിശുദ്ധപാതകളിൽ പാർട്ടി മത്സരങ്ങളും ജാതിമത്സരങ്ങളും സങ്കുചിത മത ചിന്തകളും എല്ലാം വളർന്ന് പടർന്നുകൊണ്ടിരുന്നു.  രാഷ്ട്രീയ പ്രവർത്തനം ഒരു ജീവിതമാർഗമായി അക്കാലത്ത് അധ:പതിച്ചിരുന്നു.

                 അത്യുന്നതന്മാർ അഴിമതിയുടെ കൊടുമുടികൾ നിർമ്മിക്കുന്നു. ഓഫീസുകൾ കൈക്കൂലിയുടെ അഴുക്കുചാലുകൾ മൂലം ദുർഗന്ധപൂരിത മായിരിക്കുന്നു. ഏതാനും ലക്ഷപ്രഭുക്കളും അധോലോക നായകന്മാരും ഭരണകേന്ദ്രത്തിന്റെ റിമോട്ട് കൺട്രോൾ കേന്ദ്രങ്ങളായി പ്രവർത്തിക്കുന്നു. രാഷ്ട്ര നിർമ്മാണ പ്രവർത്തനങ്ങളിൽ നിന്നും വ്യതിചലിച്ച് യുവതലമുറ മദ്യാസക്തിക്കും കാമഭ്രാന്തിനും അടിമപ്പെട്ടുകൊണ്ടിരിക്കുന്നു പത്രമാധ്യമങ്ങൾ ബഹുജന മാനസമലിനീകരണം നടത്തിക്കൊണ്ടിരിക്കുന്നു.  ഇങ്ങനെ സ്വാതന്ത്ര്യാനന്തര ഭാരതത്തിൽ തഴച്ചുവളരുന്ന എല്ലാ കുടിലശക്തികളുടെയും മേൽ തൻ്റെ ആക്ഷേപഹാസ്യം ചൊരിഞ്ഞ് അത്തരം മേഖലകളെ സംസ്കൃതീകരിക്കുകയാണ് ചെമ്മനം ചാക്കോ.

പുല്ല് പ്ലാന്റേഷൻ , പാൽ കമ്മീഷൻ

         സ്വത്തു വർദ്ധിപ്പിക്കുന്നതിനുള്ള സമ്പാദ്യ പദ്ധതിയിൽ ചേർന്ന് ജീവിതം തന്നെ വഴിമുട്ടിപ്പോകുന്നവരെ കണക്കറ്റ് പരിഹസിക്കുന്ന കവിതയാണ് പുല്ല് പ്ലാന്റേഷൻ. നമ്മുടെ സമൂഹത്തിൽ ഇന്നും നടക്കുന്ന തട്ടിപ്പുകളിൽ പ്രധാനപ്പെട്ട ഒന്നിനെ വർഷങ്ങൾക്കു മുൻപേ ചൂണ്ടിക്കാണിക്കുകയാണ് പുല്ലു പ്ലാൻ്റേഷൻ എന്ന കവിതയിലൂടെ. കാൽ ലക്ഷം രൂപ ഇപ്പോൾ മുടക്കിയാൽ 40 വർഷം തികയുമ്പോൾ 50 കോടി സമ്പാദ്യം എന്ന് പ്രഖ്യാപിച്ചു കൊണ്ടാണ് കവിത ആരംഭിക്കുന്നത്. ചുളുവിൽ ലാഭം നേടാൻ മുൻപിൻ  നോക്കാതെ എടുത്തുചാടുന്നവർക്കുള്ള മുന്നറിയിപ്പാണ് ഈ കവിത. മലയാളികൾ എല്ലാവരും പരസ്യവാചകങ്ങളിൽ ഭ്രമിച്ചു പോകുന്നവരാണ്. പരസ്യത്തിന്റെ ആകർഷണ വലയത്തിൽപ്പെട്ടു പോയ മലയാളി അതിൽ പതിയിരിക്കുന്ന അപകടങ്ങൾ അറിയുന്നില്ല. പ്ലാന്റേഷനിൽ അംഗമാവുക എന്നത് അഭിമാന ലക്ഷണമായി അവർ സ്വീകരിക്കുന്നു. ഭൂമാഫിയകളെയും കവിതയിൽ വിമർശനത്തിന് വിധേയമാക്കുന്നുണ്ട്.

               പുല്ല് പ്ലാന്റേഷന് സമീപത്തായി തമിഴ്നാട് സർക്കാർ തുടങ്ങുന്ന ഗോവർധന ക്ഷീരവർധന കേന്ദ്രത്തെ കുറിച്ചും കവിതയിൽ ഹാസ്യാത്മകമായി അവതരിപ്പിക്കുന്നുണ്ട് .കൈ നനയാതെ മീൻ പിടിക്കാൻ ആഗ്രഹിക്കുന്നവനായി ഇന്ന് പല മലയാളികളും മാറിയിരിക്കുന്നു എന്ന് കവി പറയുന്നു.

"കൈതവമല്ല പണക്കുന്നു കാണുവാൻ

കൈ കെട്ടി വീട്ടിനകത്ത് ഇരുന്നാൽ മതി "

       എന്നുള്ള പ്രസ്താവന ചിരി ഉണർത്തും 40 വർഷത്തെ ആയുസ്സ് തമ്പുരാൻ നൽകട്ടെ എന്ന് പറയുമ്പോൾ ഐറണിയുടെ പാരമ്യം അതിൽ കവി ഒളിപ്പിക്കുന്നുണ്ട്.

           തട്ടിപ്പ് കേന്ദ്രങ്ങൾക്ക് രാഷ്ട്രീയക്കാർ നൽകുന്ന അംഗീകാരവും ബഹുമാനവും കവി ഇതിൽ ഓർമ്മപ്പെടുത്തുന്നു. ആവശ്യത്തിലധികം കൈക്കൂലി വാങ്ങി ഇവർക്ക് വേണ്ട ഒത്താശ ചെയ്തു കൊടുക്കുന്ന കൂലി സംഘങ്ങളായി രാഷ്ട്രീയരംഗം ഇന്ന് അധ:പതിച്ചിരിക്കുന്നു. അവിടെയാണ് ഈ കവിതയുടെ പ്രസക്തി നിലനിൽക്കുന്നത്.

                നമ്മുടെ നാട്ടിൽ സർവത്രികമായിരിക്കുന്ന കമ്മീഷൻ നിയമനങ്ങളെ കളിയാക്കുന്ന കവിതയാണ് പാൽ കമ്മീഷൻ. പാലു വിതരണ കേന്ദ്രത്തിലെ പണിമുടക്കിനെക്കുറിച്ച് അന്വേഷിക്കുവാൻ മന്ത്രിയുടെ അകന്ന ബന്ധവുമായ മുൻ ഹൈക്കോടതി ജഡ്ജി നിയമിതനായി. അദ്ദേഹം പാൽ വ്യവസായമുള്ളിടത്തൊക്കെ ആസ്ട്രേലിയവരെ പഠനപര്യടനം നടത്തി. മൂന്നുമാസം കഴിഞ്ഞ് 300 പേജ് ഉള്ള റിപ്പോർട്ട് അവതരിപ്പിച്ചു. കമ്മീഷൻ ചെലവ് അനേകം ലക്ഷങ്ങൾ റിപ്പോർട്ട് ഗവൺമെൻറ് കെട്ടിപ്പൂട്ടിവെച്ചു. പണിമുടക്കം അനസ്യൂതം തുടർന്നു . .ആധുനിക കാലത്തെ അനവധിയായ കമ്മീഷൻ നിയമനങ്ങളിലൂടെ പ്രശ്നപരിഹാരങ്ങൾ അല്ല മറിച്ച് സ്വന്തം ബന്ധുക്കൾക്ക് പണി ഉണ്ടാക്കുകയും ഖജനാവ് കൊള്ളയടിക്കുകയും ആണ് ലക്ഷ്യം എന്ന് ഈ കവിത ധ്വനിപ്പിക്കുന്നു അത്യുക്തിയാണ് ഇവിടെ ഹാസ്യത്തിന് ആലംബം.

         സമകാലിക ജീവിതത്തിൻ്റെ ജീർണ്ണതകളെ പരിഹസിക്കുന്ന കവിയാണ് ചെമ്മനം. മാമൂലകൾക്കും വ്യവസ്ഥിതികൾക്കും ഭരണ  വൈകല്യങ്ങൾക്കും ഭ്രാന്തൻ പരിഷ്കാരങ്ങൾക്കും എതിരെ ജാഗരൂകമാണ് ആ കവിത. നവീകരിക്കാനും പുനരുദ്ധരിക്കാനും ഉള്ള ശക്തമായ ആഗ്രഹത്തിൽ നിന്ന്  അദ്ദേഹത്തിൻ്റെ സറ്റയറിന് നിന്ദനത്തിൻ്റെയും പരിഹാസത്തിന്റെയും തലത്തിലേക്ക് തിരിയണ്ടി വന്നു. ഭാഷയുടെ നിയന്ത്രണം ചെമ്മനത്തെ ആക്ഷേപഹാസ്യകാരൻ എന്ന പദവിയിലേക്ക് ഉയർത്തി കാലത്തിന്റെ ആവശ്യങ്ങൾക്കനുസരിച്ച് സൃഷ്ടി നടത്തിയ ആളാണ് ചെമ്മനം അതുകൊണ്ടാണ് ചെമ്മനത്തിന്റെ കവിതകൾ പലപ്പോഴും ചാട്ടുളികളായി മാറുന്നതും സമൂഹ മന:സ്സാക്ഷിയിൽ ചലനം സൃഷ്ടിക്കുന്നതും.              

അടിക്കുറിപ്പുകൾ

1  ചെസ്റേറർട്ടൺ    ജി.കെ. എൻസൈക്ലോപീഡിയ ബ്രിട്ടാനിക്ക, 1927.

സഹായക ഗ്രന്ഥങ്ങൾ

1 വേണുഗോപൻനായർ,എസ്.വി,ഹാസ്യം നോവൽശിൽപ്പത്തിൽ, തിരുവനന്തപുരം: മാളൂബൻ പബ്ലിക്കേഷൻസ്,1997 

2 കുട്ടികൃഷ്ണമാരാർ, ഹാസ്യസാഹിത്യം, കോഴിക്കോട്, മാരാർ സാഹിത്യ പ്രകാശം, 1977 .

3 ചാക്കോ ചെമ്മനം. ചെമ്മനം കവിത സമ്പൂർണ്ണം, ഡിസി ബുക്സ്, കോട്ടയം,, 2001

4 പരമേശ്വരൻപിള്ള, മേക്കൊല്ല , ഹാസ്യദർശനം, എൻബിഎസ്, കോട്ടയം, 1982 .

5ലീലാവതി ,എം. കവിതാസാഹിത്യ ചരിത്രം ,കേരള സാഹിത്യ അക്കാദമി, തൃശൂർ ,1980.

ഡോ.ആഷപുല്ലാട്ട്                                                                   

അസോസിയേറ്റ് പ്രൊഫസർ  

മലയാള വിഭാഗം

ടി എം ജെ എം ഗവ. കോളേജ്

ണിമലക്കുന്ന്

കൂത്താട്ടുകുളം

ashajoby3@gmail.com