പട്ടം പറത്തുന്നവൻ എന്ന നോവലിലെ സ്വത്വസംഘർഷം

ഡോ.കല ബി.

പ്രബന്ധ സംഗ്രഹം: സാൻഫ്രാൻസിസ്‌കോയിൽ താമസമാക്കിയിട്ടുള്ള അഫ്‌ഗാൻ-അമേരിക്കൻ എഴുത്തുകാരനാണ് ഹാലിദ് ഹുസൈനി. അദ്ദേഹം എഴുതിയ “പട്ടം പറത്തുന്നവൻ” എന്ന നോവൽ അധിനിവേശ ജീവിതത്തിന്റെ ഇരകളായ മനുഷ്യരുടെ സ്വത്വസംഘർഷത്തെ പല സങ്കീർണ്ണ അവസ്ഥകളിലൂടെ ചിത്രീകരിക്കുന്നു. .ലോകചരിത്രവും മനുഷ്യാസ്തിത്വവും കൂടിക്കലരുകയും വേർപെടുകയും ചിന്നഭിന്നമാക്കപ്പെടുകയും ചെയ്യുന്ന ആഗോള സാഹചര്യത്തിൽ ദേശീയസ്വത്വവും  സ്വത്വപ്രതിസന്ധിയും സ്വത്വരാഷ്ട്രീയവും   സാധാരണമനുഷ്യനെ എങ്ങനെ ബാധിക്കുന്നു എന്ന അന്വേഷണമാണ് ഈ പഠനത്തിലൂടെ നടത്തുന്നത് .യുദ്ധവും ഭരണകൂടത്തിന്റെ സർവാധിപത്യ സ്വഭാവവും അധിനിവേശ സംസ്കാരവും കൂടിക്കലർന്ന സ്വത്വസംഘർഷത്തിന്റെ സങ്കീർണാവസ്ഥ ഈ നോവലിൽ ദർശിക്കാം.

താക്കോൽവാക്കുകൾ :

സ്വത്വബോധം,ദേശീയസ്വത്വം/സ്വത്വവുംദേശീയതയും,സ്വത്വാന്വേഷണവും മനശാസ്ത്രവും,സ്വത്വപ്രതിസന്ധിയുംഅന്യവൽക്കരണവും, സ്വത്വരാഷ്ട്രീയം .

                        അഫ്ഗാനിസ്ഥാന്റെ തലസ്ഥാനമായ കാബൂളിലെ വസീർ അക്ബർ ഖാൻ പ്രവിശ്യയിലെ  കുട്ടിയായ അമീറിന്റെയും ഉറ്റ സുഹൃത്തായ ഹസന്റെയും ബന്ധത്തിന്റെ തീഷ്ണതയും ജീവിത സംഘർഷങ്ങളും അധിനിവേശ സംസ്കാരത്തിന്റെ അടയാളവും ചേർന്ന ഒരു നോവലാണ് പട്ടം പറത്തുന്നവൻ. അധിനിവേശസംസ്കാരം മനുഷ്യസ്വത്വത്തെ പങ്കിടുകയും ഉന്മൂലനാശം വരുത്തുകയും ചെയ്യുന്ന അഫ്ഫാൻ ചരിത്രത്തിൽ മനുഷ്യസ്‌തിത്വത്തിൻറെ തലമുറ താണ്ടി എത്തുന്ന ബന്ധദാർഢ്യം ഇതിൽ ആവിഷ്കരിച്ചിരിക്കുന്നു. 1960 മുതൽ 2001 വരെയുള്ള കാലമാണ് ഈ നോവലിൽ പരാമർശം. അന്നുമുതലുള്ള ചരിത്രപരവും വംശീയവുമായ ഭിന്നതകളും ഏകീകരണങ്ങളും രാഷ്ട്രീയ സംഭവങ്ങളും ആഭ്യന്തരകലാപങ്ങളും അധിനിവേശരാഷ്ട്രീയവും ഈ നോവലിന്റെ അന്തർഭാവത്തിന് കൂടുതൽ തെളിച്ചം നൽകുന്നവയാണ്.

പട്ടം പറത്തുന്നവൻ എന്ന നോവലിലെ സ്വത്വ സംഘർഷം

                            ചരിത്രപരമായി ഒരു സമൂഹത്തിന്റെ തിരിച്ചറിവാണ് സ്വത്വബോധം .മറ്റു വ്യക്തികളിൽ നിന്ന് ഒരു വ്യക്തി വേറിട്ട് നിലകൊള്ളുന്ന സ്വഭാവ സവിശേഷത തന്നെയാണ് അയാളുടെ സ്വത്വം അഥവാ ഐഡന്റിറ്റി. വ്യക്തിയുടെ മാത്രമല്ല വ്യക്തികളുടെ കൂട്ടമായ സമൂഹത്തിനും ആർജിതസ്വത്വം  ഉണ്ട്. വ്യക്തിയിൽ അവരവർ ആയിരിക്കുന്ന അവസ്ഥയാണ് സ്വത്വം .സമൂഹത്തിൽ നിയമം ,വിശ്വാസം, ആചാരം, ചരിത്രം, മതം, ഭാഷ, ഗോത്രം ,തൊഴിൽ, എന്നീ ഘടകങ്ങളുടെ മിശ്രണമാണത്.

               വിവിധ വ്യക്തിത്വങ്ങളുടെ കൂട്ടത്തിൽ തന്റെ സത്ത എന്താണ് എന്ന ചോദ്യം ഉയരുമ്പോഴാണ് വ്യക്തി സ്വയം അന്വേഷിക്കുന്നത് ചരിത്രപരവും രാഷ്ട്രീയപരവും ദേശീയവും വംശീയവും വ്യക്തിപരവുമായ ധാരാളം കാരണങ്ങൾ ഈ അന്വേഷണത്തിന് പ്രേരകമാകുന്നതാണ്. വ്യക്തി തന്നെത്തന്നെയാണ് ഇതിലൂടെ ആരായാൻ ശ്രമിക്കുന്നത്.

                                                  ‘സ്വ’എന്ന സംസ്‌കൃത    ധാതുവിൽ നിന്നാണ് സ്വത്വം എന്ന പദത്തിന്റെ നിഷ്‌പത്തി. തന്നെ സംബന്ധിച്ച, തനിക്കുള്ള എന്നീ അർത്ഥങ്ങളാണ് ആ പദത്തിനുള്ളത്.Identity എന്ന പദമാണ് ഇംഗ്ലീഷിൽ ഉപയോഗിക്കുന്നത് .Idem എന്ന ലാറ്റിൻ പദത്തിൽ നിന്നാണ് ഇതിന്റെ നിഷ്പത്തി. സമാനം എന്നാണ് ഇതിന് അർത്ഥം .

                          ചരിത്രാതീത കാലം മുതലുള്ള മനുഷ്യന്റെ വളർച്ചയ്ക്ക് പല ഘട്ടങ്ങളുണ്ട്. ഗോത്രവ്യവസ്ഥയിൽ നിന്ന് അടിമത്തം, നാടുവാഴിത്തം, മുതലാളിത്തം, അധിനിവേശഭരണം എന്നിങ്ങനെയാണ് ക്രമേണ അതിന്റെ ഗതി. ഇതിനനുസൃതമായ സാമൂഹികശാസ്ത്ര സാമ്പത്തിക മാറ്റങ്ങൾ സമൂഹങ്ങളെയും സംസ്കാരങ്ങളെയും ആകപ്പാടെ മാറ്റിമറിച്ചു .സമൂഹമെന്ന നിലയിൽ ഗോത്രങ്ങൾ ദേശീയതകൾ ആയി മാറ്റപ്പെട്ടു. ഉപദേശിയതകൾ (subnationalities) ആയി പിൽക്കാലത്ത് അവ അതിജീവിക്കുന്നു. ഈ പരിണാമവസ്ഥകളിലൂടെ കടന്നുവന്ന മനുഷ്യ വ്യക്തിത്വങ്ങളിൽ ഗോത്രപൈതൃക സ്വഭാവം അന്തർലീനമായി കിടപ്പുണ്ട്. ഇത്തരത്തിൽ സാംസ്കാരിക സ്വാധീനം എന്ന നിലയിൽ ഗോത്രപരത സ്വത്വരൂപീകരണത്തിൽ നിർണായക പങ്കുവഹിക്കുന്നു.

ദേശീയ സ്വത്വം/ ദേശീയതയും സ്വത്വവും.

                   സ്വത്വ രൂപീകരണത്തിൽ ദേശീയതയുടെ (Nationality) സ്വാധീനമുണ്ട്. ആധുനിക ലോകവ്യവസ്ഥിതിയുടെ ഭാഗമായിട്ടാണ് ദേശീയത സ്വത്വ രൂപീകരണത്തിൽ ഉൾപ്പെടുന്നത്. ലോകരാഷ്ട്രങ്ങളുടെ വളർച്ചയും സാമ്രാജ്യങ്ങളുടെയും വർഗ്ഗങ്ങളുടെയും അധിനിവേശങ്ങളും സൃഷ്ടിച്ച അരക്ഷിതമായ ലോക അവസ്ഥയും കോളനിവാഴ്ചയും ദേശീയ സ്വത്വത്തെ രൂപപ്പെടുത്തുന്നതിന്   ഇടയാക്കി. വ്യവസായ വിപ്ലവം സൃഷ്ടിച്ച പുരോഗതി സാമ്രാജ്യങ്ങളുടെയും വർഗ്ഗങ്ങളുടെയും സൃഷ്ടിക്ക് വഴിവെച്ചതോടെ ദേശീയതകളുടെ വളർച്ചയുണ്ടായി. പാശ്ചാത്യ സാമ്രാജ്യങ്ങൾ കോളനിവൽക്കരണത്തിൽ  ഏർപ്പെടുകയും ആധിപത്യം ഉറപ്പിക്കുകയും ചെയ്തു. സ്വതന്ത്ര അസ്ഥിത്വം ഉള്ള ദേശീയതകളുടെ നശീകരണം ആയിരുന്നു ഇത്. ഇതിനെ പ്രതിരോധിക്കാൻ അവർ തങ്ങളുടെ ദേശീയത ഉയർത്തിപ്പിടിക്കാൻ ശ്രമിച്ചു. പുതിയൊരു ദേശീയമനുഷ്യനെ കേന്ദ്രസ്ഥാനത്ത് നിർത്തിയുള്ള സമരങ്ങൾ ആ കാലഘട്ടത്തിലെ സ്വത്വ സങ്കൽപ്പത്തിൽ പ്രതിഫലിച്ചു. സ്വതന്ത്രാസ്തിത്വമുള്ള ഗോത്ര സംസ്കൃതികൾക്കുമേലുള്ള ആധിപത്യം, വർഗ്ഗങ്ങളുടെ അതിക്രമിച്ചുകടക്കൽ ചെറുത്തുനിൽപ്പുകൾക്ക് കാരണമായി. ഇതിനെതിരെ അവർ തങ്ങളുടെ ദേശീയതയെ ഉയർത്തിപ്പിടിക്കാൻ ശ്രമിച്ചു. ഇത്തരത്തിലുള്ള പ്രതിരോധ രാഷ്ട്രീയം അക്കാലത്തെ സ്വത്വ സങ്കൽപത്തിൽ പ്രതിഫലനങ്ങൾ ഉണ്ടാക്കി.

സ്വത്വാന്വേഷണവും മന:ശാസ്ത്രവും

        വ്യക്തിയുടെ മാനസിക ഘടനയെ ആസ്പദമാക്കി അത് സമൂഹത്തോട് ബന്ധപ്പെടുന്നതെങ്ങനെയെന്നതാണ് മന:ശാസ്ത്രാധിഷ്ഠിതമായ സ്വത്വാന്വേഷണം. മനുഷ്യർ അവരായിരിക്കുന്നതിന് പിന്നിലെ ‘മാനസികസത്ത’യെ ആണ് മനശാസ്ത്രം മുഖ്യമായി കാണുന്നത്. സ്വത്വചിന്തയുടെ ഉത്ഭവം, ആ ബോധം ഉടലെടുക്കുന്നതിന്റെ കാരണങ്ങൾ, സ്വത്വബോധത്തിനു നിദാനമായ ഘടകങ്ങൾ, മനുഷ്യന്റെ ഏതേതവസ്ഥകളിൽ എന്തൊക്കെ രൂപീകരണങ്ങൾ നടക്കുന്നു എന്നിവയാണ് അവർ അന്വേഷിക്കുന്നത്. എറിക്ക് എച്ച്. ലിറിക്സൺ, മാർഗരറ്റ്മാഹലർ , ഡി.ഡബ്ള്യൂ. ഹന്നിക്കോട്, എഡിത്ത് ജാക്കോബ്സൺ തുടങ്ങിയ മനോവിജ്ഞാനീയ സ്വത്വ കേന്ദ്രീകൃതമായ മുഖ്യ സിദ്ധാന്തങ്ങൾ അവതരിപ്പിച്ചത്.

                                 ഇതിൽ ഏറ്റുവും ശ്രദ്ധേയമായിരിക്കുന്നത് എറിക് എച്ച്. എറിക്സൻ്റെ കണ്ടെത്തലുകളാണ്. ഉദ്ദീപ്തമായ അനന്യതയെ കുറിച്ചുള്ള കർത്തൃത്വബോധം(Subjective Sense of an invigorating sameness) എന്ന് ‘സ്വത്വ’ത്തെ അദ്ദേഹം നിർവചിക്കുന്നു¹.സ്വത്വത്തിന് രണ്ട് വശങ്ങളുണ്ട്. ഒന്ന് വ്യക്തിയുടെ ഉള്ളിലേക്ക് തിരിഞ്ഞു നോക്കുന്നു. മറ്റൊന്ന് സമൂഹത്തിന് നേരെയും. കാലങ്ങളിലൂടെ വെളിപ്പെടുന്ന വ്യക്തിയുടെ ആത്മബിംബ(Self-Image)ത്തി ലേക്കും ഞാൻ അന്യനാണെന്ന ആത്മവിശ്വാസത്തിലേക്കുമാണ് ആദ്യ വശം തിരിഞ്ഞിരിക്കുന്നത്. തന്നെ മറ്റുള്ളവർ താനായിത്തന്നെ തിരിച്ചറിയുന്നതിൽ നിന്ന് ജനിക്കുന്ന ആത്മവിശ്വാസത്തിലും സാമൂഹിക ധർമ്മവുമായി (Social Role) തന്റെ ആത്മബിംബത്തെ യോജിപ്പിക്കുന്നതിനുള്ള ശേഷിയിലുമാണ് രണ്ടാമത്തെ വശം ഊന്നുന്നത്².

                             സ്വത്വത്തിന്റെ രൂപപ്പെടൽ ജനനത്തോടെ ആരംഭിക്കുകയും ജീവിതത്തിൽ ഉടനീളം തുടരുകയും ചെയ്യുന്നുണ്ട്. ശൈശവവും കൗമാരവും സ്വത്വരൂപീകരണത്തിലെ പ്രധാന ഘട്ടങ്ങളായി മനശാസ്ത്രജ്ഞർ കാണുന്നു. വ്യക്തിയിൽ ശൈശവദശയിൽ ആത്മ ബിംബം(Self Image) സൃഷ്ടിക്കപ്പെടുന്നത് അഹംബോധ(Ego)ത്തിന്റെ പ്രവർത്തനഫലമായാണ്. സ്വത്വരൂപീകരണത്തിന്റെ ഈ ആദ്യഘട്ടങ്ങളെ ഈഗോ ഐഡന്റിറ്റി(Ego Identity) എന്ന് എറിക്സൺ നിരീക്ഷിക്കുന്നു. സാമൂഹ്യയാഥാർത്ഥ്യത്തിൽ തന്റെ ആത്മസത്തയുടെ യാഥാർത്ഥ്യത്തെക്കുറിച്ചുള്ള ബോധമാണ് വ്യക്തിയുടെ ആന്തര വ്യാപാരങ്ങളുടെ തുടർച്ചയെ കുറിച്ചുള്ള പദമാണ് ആത്മസത്ത(Self). വിശാലമായ അർത്ഥത്തിൽ സ്വത്വത്തെ ആത്മസത്ത(Self) ആത്മസങ്കല്പം (Self Concent) ആത്മവ്യവസ്ഥ (Self System) ചഞ്ചലമായ ആത്മാനുഭവം (Fluctuating Self experience )  എന്നിങ്ങനെ മനോവിജ്ഞാനിയത്തിൽ സൂചിപ്പിക്കുന്നുണ്ട്.³

                                   ലോകവ്യവസ്ഥയുടെ മാറ്റത്തോടെ സ്വത്വനിർണയത്തിലും മാറ്റം ഉണ്ടായി. ഇത് ‘എന്താണ് ഞാൻ’ എന്ന മനുഷ്യനിലെ അടിസ്ഥാനപരമായ ചോദ്യം ‘ഞാനെന്താണ് ആയിത്തീരേണ്ടത്’ എന്ന് പരിണമിച്ചു⁴എന്ന് അടയാളപ്പെടുത്തിയിട്ടുണ്ട്. കുറച്ചുകൂടി സങ്കീർണമായി ‘സ്വത്വം’ എന്ന സങ്കല്പനത്തിന് ആധുനിക കാഴ്ചപ്പാടിൽ ‘വിഷാദാത്മകമായ ആരായൽ’(Desperate quest) അഥവാ ചിന്താകുഴപ്പം നിറഞ്ഞ അന്വേഷണം(Confused search) എന്ന പരിവർത്തനം വന്നുചേർന്നു. നവലോക രാഷ്ട്രീയതയും അധിനിവേശ സംസ്കാരവും മനുഷ്യൻ ആര് എന്നതിൽ നിന്ന് സാമൂഹിക തലത്തിലുളള വ്യക്തിത്വത്തിൻ്റെ തുടർച്ചാ നഷ്ടവും അസ്ഥിരതയെക്കുറിച്ചുള്ള സന്ദേഹവുമുണ്ടാക്കി. ഈ സന്ദേഹത്തിന് സ്വത്വത്തെക്കുറിച്ചുള്ള ചിന്താ കുഴപ്പം (Identity Confusion) എന്ന് എറിക്സൺ ⁵ വിളിക്കുന്നു.

സ്വത്വ പ്രതിസന്ധിയും അന്യവൽക്കരണവും

                    അന്യവൽക്കരണം(Alienation) ഏറ്റവും വലിയ പ്രതിസന്ധി ആണ്. “കുടുംബം എന്ന പ്രാഥമിക ഘടകം തുടങ്ങി സംസ്കൃതികൾ തുടങ്ങിയ എല്ലാ കൂട്ടായ്മകളുടെയും തഴച്ചുവളരലും തളർന്നു തരിപ്പണമാവലും സംഭവിച്ചിട്ടുള്ളത് ഈ കൂട്ടായ്മയിലെ അംഗങ്ങൾക്ക് അതിനോടുള്ള ബന്ധദാർഢ്യം (Belonging) അനുസരിച്ചാണ്. തങ്ങളും ആ സമഗ്രതയുടെ ഭാഗമാണ്. തങ്ങൾക്കും അതിന്റെ ഭാഗധേയങ്ങളിൽ പങ്കാളിത്തമുണ്ട്. ആ സമൂഹത്തിൽ താനും മറ്റാരെയും പോലെ മാനിക്കപ്പെടുന്നുയെന്നുള്ള തോന്നലാണ് ഈ ഭാഗഭാഗിത്വത്തിന്റെ കാതൽ. അതിന് ഊനം തട്ടുമ്പോൾ വന്നു സംഭവിക്കുന്ന അന്യത്വ ബോധം-വേറാക്കൂറ്- അതിന്റെ തകർച്ചയ്ക്കും വഴിവയ്ക്കുന്നു⁶. നിലവിൽ സമൂഹത്തിൽ നിന്ന് വേറിട്ട് നിൽക്കുന്നു എന്ന ബോധ്യമാണ് അന്യവൽക്കരണം. അന്യവൽക്കരണം ഒറ്റപ്പെടുത്തലിന്റെ വേദനയും മോഹഭംഗവും ആത്മശേഷണവും വ്യക്തിയിൽ അടിച്ചേൽപ്പിക്കുന്നു⁷ അവനവനിൽ നിന്നുള്ള ബന്ധവിച്ഛേദം അന്യവൽക്കരണത്തിന്റെ ഭാഗമാണ്. സ്വത്വപ്രതിസന്ധിയുടെ മുഖ്യഘടകങ്ങളിൽ ഒന്ന് ഇതാണ്.

                         വൈയക്തിക സ്വത്വത്തിനൊപ്പം സാമൂഹിക സ്വത്വവും ഇന്ന് പ്രസക്തമാണ്. യുദ്ധക്കെടുതികളും സാമ്പത്തിക പ്രതിസന്ധികളും വർഗ വർണ്ണ- വിവേചനങ്ങളും അതിന്റെ സാധ്യത വർദ്ധിപ്പിച്ചു. Political Identity,Ethnic Identity,Black Identity, Indian Identity എന്നീ പുതുപദങ്ങൾ സാഹിത്യത്തിലും സാമൂഹ്യശാസ്ത്രത്തിലും രാഷ്ട്രീയ മീമാംസയിലും സർവ്വസാധാരണമാണ്.

സ്വത്വ രാഷ്ട്രീയം

                      ഒരു വ്യക്തിയുടെ അഥവാ ഒരു സമൂഹത്തിന്റെ സ്വത്വത്തെകുറിച്ചുള്ള തിരിച്ചറിവാണ് സ്വത്വരാഷ്ട്രീയത്തിന്റെ കാതൽ. അധിനിവേശ സംസ്കാരത്തെ പ്രതിരോധിക്കാൻ തങ്ങളുടെതായ ഭാഷാ, വസ്ത്രം, ആചാരം, ആഘോഷങ്ങൾ,മര്യാദ,പെരുമാറ്റം തുടങ്ങിയവയെല്ലാം ഇത്തരത്തിൽ ഉപയോഗിക്കപ്പെടുന്നു. എന്തിന്റെ പേരിലാണോ, ഒരു വിഭാഗം അവഗണിക്കപ്പെടുകയോ മാറ്റിവെക്കപ്പെടുകയോ ചെയ്യുന്നത് അതിന്റെ അടിസ്ഥാനത്തിൽ തന്നെ അംഗീകരിക്കാൻ വാദിച്ചു കൊണ്ടാണ് സംസ്കാരരാഷ്ട്രീയം(Cultural Politics) സ്വത്വരാഷ്ട്രീയമായി(Identity Politics)  പരിണമിച്ചത്.⁸

                     ഇത്തരത്തിൽ വ്യക്തിയുടെയോ സമൂഹത്തിന്റെയോ യഥാർത്ഥ സ്വത്വത്തെ പ്രതികൂലമായി ബാധിക്കുന്ന സാമൂഹ്യ രാഷ്ട്രീയ സാഹചര്യങ്ങളിൽ വ്യക്തി സ്വത്വസംഘർഷം അനുഭവിക്കുന്നു. ‘പട്ടം പറത്തുന്നവൻ’ എന്ന നോവലിലെ കഥാപാത്രങ്ങൾ അനുഭവിക്കുന്ന സ്വത്വസംഘർഷത്തിന്റെ ആഴവും പരപ്പും അതിനുകാരണമായ രാഷ്ട്രീയ-ചരിത്ര-വർഗ്ഗപരമായ കാര്യകാരണങ്ങളുമാണ് ഈ നോവലിലെ കേന്ദ്ര പ്രമേയം.

സ്വത്വസംഘർഷം  നോവലിലെ കഥാപാത്രങ്ങളിലൂടെ ഒരു അന്വേഷണം

                    പട്ടം പറത്തുന്നവൻ എന്ന നോവലിലെ പ്രധാന കഥാപാത്രങ്ങളായ അമീർ, ബാബ, സോറാബ്, ആസീഫ്, ഹസ്സൻ, സനൗബർ എന്നിവരുടെ ജീവിതവും അവർ നേരിട്ട സ്വത്വപ്രതിസന്ധിയും സ്വദേശത്തിൽ നിന്ന് അഭയാർത്ഥിയായി മാറാൻ വിധിക്കപ്പെട്ട ഭരണ മാറ്റങ്ങളും അഫ്ഗാൻ ജനതയ്ക്കു മേൽ അടിച്ചേല്പിച്ചത് വലിയ ദുരിതങ്ങളാണ്. ആ രാജ്യത്തിൻ്റെ ചരിത്രാരംഭം മുതലുള്ള അധിനിവേശങ്ങൾ (അറേബ്യൻ , ബ്രീട്ടീഷ്, റഷ്യൻ) രണ്ടാം ലോകമഹായുദ്ധം, ആഭ്യന്തര കലാപങ്ങൾ, മുജാഹിദ്ദീൻ ഗ്രൂപ്പുകളുടെ പ്രതിരോധം,താലിബാൻ നിയന്ത്രണം, ബിൻ ലാദൻ പ്രശ്നം ഐക്യരാഷ്ട്രസഭയുടെ സാമ്പത്തിക ഉപരോധം തുടങ്ങിയവ ഈ നോവലിൻ്റെ അന്തരഘടനയിൽ കൃത്യമായി ഉൾച്ചേർന്നിരിക്കുന്നു. വംശീയവൈവിധ്യവും ഇവിടുത്തെ ജനതയുടെ വ്യക്തിസ്വത്വത്തെയും സാമൂഹിക സ്വത്വത്തെയും നിർണ്ണായകമായി സ്വാധീനിച്ചിട്ടുണ്ട്. പഷ്ടു, ദാരി എന്നീ 85% ആളുകൾ സംസാരിക്കുന്ന ഔദ്യോഗിക ഭാഷ കൂടാതെ 30 ഓളം ചെറുഭാഷകൾ സുന്നി ഹസാര എന്നീ വിഭാഗങ്ങൾ ഇവയെല്ലാം കൂടിക്കലർന്ന അതിസങ്കീർണ്ണമായ സാംസ്കാരിക പശ്ചാത്തലവും ഈ നോവലിൽ വളരെ പ്രധാനമാണ്.  

                 യുദ്ധം നാമാവശേഷമാക്കിയ കോളേജ് അധ്യാപകൻ തെരുവുതെണ്ടിയായി മാറുന്നതും അയാളിൽ നിന്ന് താൻ ജനിച്ചപ്പോഴേ മരിച്ച തൻ്റെ അമ്മയുടെ സ്വഭാവം ചോദിച്ചറിയുന്ന അമീറും അച്ഛന്മാരില്ലാത്ത അഫ്ഗാൻ കുട്ടികളും ജോലിയെടുത്ത് മക്കളെ പോറ്റാൻ സമ്മതിക്കാത്ത താലിബാൻ ഭീകരതയ്ക്കടിപ്പെട്ട് കുട്ടികളെ അനാഥാലയത്തിൽ വിടുന്ന അമ്മമാരും ആര് എപ്പോൾ എവിടെ എങ്ങനെ കൊല്ലപ്പെടുമെന്ന് നിശ്ചയമില്ലാതെ കഴിയേണ്ടി വരുന്ന യുദ്ധാന്തരീക്ഷവും ചേർന്ന് ഈ നോവലിലെ ഒന്നിലധികം കഥാപാത്രങ്ങൾ വംശീയവും രാഷ്ട്രീയവും വൈയക്തികവുമായ സ്വത്വ സംഘർഷം അനുഭവിക്കുന്നവരാണ്. കൃത്രിമക്കാല് വിറ്റ് ഒരാഴ്ചത്തേക്കുള്ള ആഹാരം കണ്ടെത്തുന്ന സാധാരണക്കാരനും അന്യവൽക്കരിക്കപ്പെടുന്നത് തൻ്റെ ദേശത്തു നിന്നാണെന്നും തൻ്റെ തന്നെ ഉള്ളിൽ നിന്നാണെന്നും തിരിച്ചറിയപ്പെടുന്നതിനു മുൻപേ ഉന്മൂലനാശം സംഭവിച്ചേക്കാവുന്ന യുദ്ധാന്തരീക്ഷത്തിലെ വ്യക്തി ബോധം സ്വത്വ സംഘർഷത്തിൻ്റെ ഉന്നത തലങ്ങളെ സാർത്ഥകമായി ആവിഷ്കരിക്കുന്നു.

                കാബൂളിൽ ആട്ടിറച്ചി കഴിക്കാവുന്നത് താലിബാനു മാത്രം. താടി പരിശോധന , അയഞ്ഞകുപ്പായം എന്നീ വസ്ത്രധാരണ രീതികളിൽ പോലും നിബന്ധന വയ്ക്കുന്ന ദേശീയ സ്വത്വബോധം അവിടുത്തെ വംശീയ വൈവിധ്യത്തെ അടിച്ചമർത്തുന്നു. ഹസനും മകനും തങ്ങളുടെ പാരമ്പര്യ മുദ്രയുള്ള കവണപ്രയോഗിക്കുന്നതിൽ സമർത്ഥരായിരുന്നത് അവരുടെ സ്വത്ത് സംരക്ഷണത്തിന്റെ അധിനിവേശാക്രമണത്തിന്റെ നേരെയുള്ള പ്രതിരോധ മാർഗമായി ഉപയോഗപ്പെടുത്തുന്നുണ്ട്. ആസിഫിൻ്റെ ക്രൂരതയിൽ നിന്ന് രക്ഷപ്പെടാൻ സഹായിക്കുന്നത് അവന്റെ കവണപ്രയോഗമാണ് .

           പട്ടംപറത്തൽ ടൂർണ്ണമെന്റ് താലിബാൻ ഭരണം നിർത്തലാക്കുന്നതിലൂടെ വർഗ്ഗ ഭേദമില്ലാതെ കഴിവുകൊണ്ട് മാത്രം അംഗീകാരം കിട്ടുന്ന ഒരു സാംസ്കാരിക ഉത്സവം കൂടിയാണ് നിരോധിക്കുന്നത്. അമീറിന്റെ സ്വത്വരൂപീകരണത്തിൽ ബാബയ്ക്കു മുൻപിൽ വിജയിയാവാനും  ഹസനുമുന്നിൽ തലയുയർത്തിപ്പിടിക്കാതിരിക്കാനും ഉള്ള സാഹചര്യം തീർത്തത് പട്ടം പറത്തൽ ടൂർണമെന്റിലെ വിജയമായിരുന്നു. തന്നിലേക്ക് തന്നെ ആണ്ടിറങ്ങിയിരുന്നവനിൽ നിന്ന് ബാബയുടെ സ്നേഹാകാശത്തിലേക്ക് പട്ടം പോലെ പറന്നുയർന്നത് ഓർക്കുമ്പോഴും ആ പട്ടത്തിന്റെ നൂല് ഹസനാണ് പിടിച്ചിരുന്നത് എന്ന യാഥാർത്ഥ്യം അമീറിന്റെ സ്വത്വ സംഘർഷത്തെ നോവലിൽ ഉടനീളം പരക്കുന്ന മാസ്മര ശക്തിയായി മാറ്റുകയാണ്.

                           വൈയക്തികസ്വത്വരൂപീകരണഘടകങ്ങൾ, സ്വത്വപ്രതിസന്ധിയുടെ കാരണങ്ങൾ, സ്വത്വാന്വേഷണത്തിന്റെ യത്നങ്ങൾ എന്നിവ ഈ നോവലിൽ ഉടനീളം കാണാം. വ്യക്തി സ്വത്വത്തിൻ്റെ രൂപപ്പെടലും വ്യക്തിയുടെ ശൈശവം  മുതലുള്ള മനോനിലയും തമ്മിലുള്ള ബന്ധം ‘അമീറി’ന്റെ ജീവിത അവതരണത്തിൽ സ്വത്വസംഘർഷഭരിതമായി ഉൾചേർന്നിരിക്കുന്നു . അയാളുടെ യൗവനം സ്വത്വപ്രതിസന്ധിയുടെ മൂർദ്ധന്യതയിലാണ്.

             സർവ്വാധിപത്യ സ്വഭാവമുള്ള ഭരണകൂടം ഒരു രാഷ്ട്രത്തിന്റെ സഞ്ചിത സ്വത്വത്തെ തകർക്കുന്നതിന്റെ കഥ കൂടിയാണ് ഈ നോവൽ. സാമൂഹികസ്വത്വതകർച്ച വ്യക്തിസ്വത്വങ്ങളുടെയും തകർച്ചയാണ്. സർവ്വാധിപത്യം അധികാരപ്രയോഗത്തിന്റെയും പൗരാവകാശ ലംഘനത്തിന്റെയും മർദ്ദനത്തിന്റെയും നിഷ്ഠൂരതയിലൂടെ ആ സ്വത്വത്തെ ആക്രമിക്കുന്നു.അങ്ങനെ സമൂഹവും വ്യക്തിത്വവും ഒരേപോലെ തകർന്നടിയുന്നു.

കുറിപ്പുകൾ

1 Erikson 1983 :19

2. Ibid 1983: 36

3. Ibid 1983:209

4. Ibid 1983 :19

5. Ibid, 1983: 131

6. ബാലഗോപാൽ എം.പി. വേറാക്കൂറ് പു .81

7. Schacht Richard, Alienation, London O George Allen and Unwin, P257

8. പോക്കർ പി. കെ,സ്വത്വരാഷ്ട്രീയം പു. 11

സഹായക ഗ്രന്ഥങ്ങൾ

1.ഖാലിദ്ഹൊസൈനി, പട്ടംപറത്തുന്നവൻ, (വിവ)രമാമേനോൻ ഡി.സി. ബുക്സ്, 2014

2. പോക്കർ പി. കെ, സ്വത്വ രാഷ്ട്രീയം പ്രോഗ്രസ് പബ്ലിക്കേഷൻസ്, കോഴിക്കോട്, 2007.

3. ബാലഗോപാൽ, എം.പി., വേറാക്കൂറ്, എസ്. പി. സി. എസ് കോഴിക്കോട് 1980 .

4. മഹേഷ് എം. ആർ, മലയാള നോവലും ദേശീയതയും, കേരള സർവകലാശാല തിരുവനന്തപുരം 2012

5. Erikson Erik H, Identity: Youth and Crisis, London Faber and faber, 1985

6. Schacht Richard, Alienation, Landon, George Allen and Unwin, 1971

7. Taylor Charles Hegel and Modern Society, Cambridge: Cambridge University Press, 1989

---

ഡോ. കല.ബി

അസോസിയേറ്റ് പ്രൊഫസർ,

മലയാളവിഭാഗം,

ശ്രീ സി അച്യുതമേനോൻ ഗവണ്മെന്റ്      കോളേജ്,തൃശൂർ