സ്വപ്നാടനം

കവിത

അമ്മയരച്ച അരപ്പുകളാൽ

തേഞ്ഞ അമ്മി

അകം വളഞ്ഞ്

ആർക്കും വേണ്ടാതെ

മുക്കിലൊതുങ്ങി

നെഞ്ചിൽ

ചെന്തീച്ചുവപ്പുള്ള കാന്താരിയെരിവിൻ

പൊള്ളൽത്തിണർപ്പുകൾ

ഒതുക്കുമ്പോൾ

ചാടിപ്പോയ മഞ്ഞൾ പൊട്ടുകൾ

കണ്ണീർ വീഴ്ത്തിയ

ഉള്ളിച്ചെതുമ്പലുകൾ

ഉരുണ്ടു വീണു മുളച്ച

കടുകുമണികൾ

വളച്ചുകെട്ടി

കൂടികിടപ്പായ

നെയ്യുറുമ്പിൻ കൂട്ടങ്ങൾ

അമ്മിത്തറച്ചുവരിൽ

കൂടുകൂട്ടിയ

വേട്ടാളന്റെ മുരൾച്ചകൾ

കണ്ണ്തെറ്റാൻ

കാത്തു നിന്ന

കരിങ്കണ്ണൻ കാക്കയുടെ

ചെരിഞ്ഞ നോട്ടം

ചമ്മന്തിയരക്കുമ്പോൾ

വാരിത്തിന്ന്

എരിഞ്ഞു പിടഞ്ഞോടിയത്

അരച്ചതുഴിഞ്ഞ് വാങ്ങവേ

കണ്ണിലേക്ക് പാറിവീണ

മുളക് വെളളത്തുള്ളികൾ

അരച്ചരച്ച് തേഞ്ഞ്

പെരുങ്കൊല്ലത്തിയെ

കാത്ത കാലം

അന്നു കൊത്തിയ

ഉളിപ്പാടുകൾ

കാലമെടുത്തു

കറുത്തു പോയി

സ്വപ്നാടനത്തിൽ

മൂർച്ചപ്പെടവേ അമ്മി

നാഭിയിലെ ഉളിക്കൊത്തിനാൽ

ഉലഞ്ഞുന്മത്തയായി

---

എ. മുജീബ് റഹ്മാൻ

അഴിക്കോട്ടിൽ മംഗലം പി.ഓ. മലപ്പുറം 676 561

Mob: 99 47 91 61 16