വികസനം എന്നത് മനുഷ്യ വിഭവശേഷിയുടെ വികസനമാണ്.

അഭിമുഖം

പ്രൊഫ. വി. കാർത്തികേയൻ നായർ / ചിന്ത എസ്. ധരൻ & ശരണ്യ യു.

1.“വികസനവും മൂല്യസംരക്ഷണവും തമ്മിലുള്ള സംഘർഷം” – കേരളത്തിന്റെ 70 വർഷത്തെ ചരിത്രത്തിന്റെ പശ്ചാത്തലത്തിൽ രേഖപ്പെടുത്താമോ? 

സംസ്ഥാന രൂപീകരണത്തിന് ശേഷം അതിവേഗത്തിലുള്ള മാറ്റങ്ങളാണ് കേരളത്തിൽ സംഭവിച്ചത്. അതിൽ ഏറ്റവും പ്രധാനം സ്കൂൾ വിദ്യാഭ്യാസം സൗജന്യമാക്കിയതും ജനിക്കുന്ന മുഴുവൻ കുഞ്ഞുങ്ങൾക്കും സ്കൂൾ വിദ്യാഭ്യാസം പ്രാപ്തമാക്കിയതുമായിരുന്നു. കൊളോണിയൽ മാതൃകയിലുള്ള വിദ്യാഭ്യാസമാണ് ഇന്ത്യയിലും കേരളത്തിലും നിലനിൽക്കുന്നത് എന്നതിനാൽ അതുവഴി കേരളീയർക്ക് ലഭിച്ചത് ആശയങ്ങളും സിദ്ധാന്തങ്ങളുമായിരുന്നു. യൂറോപ്പിൽ സംഭവിച്ചതെല്ലാം ഇവിടെയും സംഭവിച്ചു എന്ന് വരുത്തിത്തീർക്കാനാണ് പണ്ഡിതന്മാർ ശ്രമിച്ചത്. കാരണം, അവർ കൊളോണിയൽ പദ്ധതിയുടെ ഉൽപ്പന്നങ്ങൾ ആയിരുന്നു. അങ്ങനെയാണ് കേരളചരിത്രത്തിലെ നൂറ്റാണ്ട് യുദ്ധവും നവോത്ഥാനവും അധ്യയന വിഷയങ്ങളായി തീർന്നത്. നൂറ്റാണ്ട് യുദ്ധം ആക്രമണ വിധേയമായെങ്കിലും നവോത്ഥാനം വിമർശന വിധേയമായില്ല. അതിന്റെ പോരായ്മ നമ്മുടെ മൂല്യ സങ്കൽപ്പനങ്ങളെയും ബാധിച്ചു.

        ഒരു ഉത്പാദനവ്യവസ്ഥയിൽ നിന്നും മറ്റൊരാളിലേക്ക് സമൂഹം പരിവർത്തനം ചെയ്യുമ്പോൾ പഴയ വ്യവസ്ഥ ഉല്പാദിപ്പിച്ച മൂല്യങ്ങളും പുതിയ വ്യവസ്ഥയുടെ മൂല്യങ്ങളും തമ്മിൽ സംഘർഷം ഉണ്ടാകും. ഈ സംഘർഷത്തിലൂടെ പഴയതിനെ നിരാകരിക്കുകയും പുതിയതിനെ സ്വീകരിക്കുകയും ചെയ്യുന്ന പ്രക്രിയയാണ് നവോത്ഥാനം. അപ്പോഴും പഴയത് പലതും തിരസ്കൃതമാകാതെ നിൽക്കും. ജാതി - ജന്മി - നാടുവാഴി - പൗരോഹിത്യ വ്യവസ്ഥയിൽ നിന്നും മുതലാളിത്ത വ്യവസ്ഥയിലേക്കുള്ള പരിവർത്തന ഘട്ടത്തിലാണ് കേരളത്തിൽ നവോത്ഥാനം ഉടലെടുക്കുന്നത്. മൂലധനത്തിന്റെ കടന്നുവരവിന്റെ ഫലമായി ഭൂബന്ധങ്ങളിൽ മാറ്റം വന്നു. മൂലധന സഞ്ചാരത്തിനു വേണ്ടി സഞ്ചാര സ്വാതന്ത്ര്യം അനുവദിക്കേണ്ടതായി വന്നു. ജാതി അനാവശ്യമായി തീർന്നു. മിൽത്തുണിയുടെ രംഗപ്രവേശം വസ്ത്രധാരണ സമ്പ്രദായങ്ങളിൽ മാറ്റം വരുത്തി. ദേവാലയങ്ങൾ സമൂഹത്തിന്റെ വകയായി. ഈ പരിവർത്തനത്തിന് നേതൃത്വം കൊടുത്തത് മധ്യവർഗമായിരുന്നു. തൊഴിലാളി വർഗ്ഗം ജനിക്കുന്നതിനു മുൻപ് മധ്യവർഗ്ഗമായിരുന്നു പുരോഗമനത്തിന്റെ ചാലക ശക്തി. സന്യാസിമാരെ മധ്യവർഗ്ഗം ഉപയോഗപ്പെടുത്തുകയായിരുന്നു.

         സ്വാതന്ത്ര്യലബ്ധിയോടു കൂടി കൊളോണിയലിസവും നാട്ടുവാഴിത്തവും അപ്രത്യക്ഷമായി. ജാതിവ്യവസ്ഥ ദുർലഭമായി. കമ്മ്യൂണിസ്റ്റ് മന്ത്രിസഭ നടപ്പാക്കിയ ഭൂപരിഷ്കാരം ജന്മിത്തത്തെയും ഇല്ലാതാക്കി. എന്നാൽ പൗരോഹിത്യവും ജാതിബോധവും ഇല്ലാതായില്ല.അവ ഇപ്പോഴും ശക്തമായി തുടരുന്നു. കേരളം ഏറെ വികസിച്ചിട്ടും ഇവ രണ്ടും മാറിയിട്ടില്ല. എന്നുമാത്രമല്ല ആധുനികതയെ ഉൾക്കൊള്ളുമ്പോഴും പ്രാചീനതയെ സംരക്ഷിക്കുന്നു. ജാതകം കമ്പ്യൂട്ടറിൽ ഗണിക്കുന്നു. എല്ലാ ചികിത്സയും സ്വീകരിച്ചതിനുശേഷം രോഗശാന്തിക്കായി ഈശ്വര പ്രാർത്ഥന നടത്തുന്നു. മുഹൂർത്തം നോക്കി താലി കെട്ടുന്നു. വിവാഹമോചനത്തിന്റെ എണ്ണം വർദ്ധിക്കുന്നു. സ്ത്രീ ശാക്തീകരണം പ്രസംഗിക്കും. അധികാരത്തിൽ നിന്നും പദവികളിൽ നിന്നും അവരെ ഒഴിവാക്കും. ദളിത് സമത്വം പ്രസംഗിക്കും. സംവരണസ്ഥാനങ്ങൾ ഒഴികെ മറ്റൊന്നും അവർക്ക് നൽകില്ല. തൊഴിലാളി വർഗ്ഗ ബോധത്തിനുമേൽ മധ്യവർഗ ബോധം ആധിപത്യം പുലർത്തുന്നത് കൊണ്ടാണിത് സംഭവിക്കുന്നത്.

2.സാമൂഹ്യനീതി, മതേതരത്വം, ജനാധിപത്യം എന്നീ മൂല്യങ്ങളുടെ സംയോജനം കേരളത്തിൽ സാധ്യമായത് എങ്ങനെയാണെന്നാണ് അങ്ങയുടെ അഭിപ്രായം ?

സാമൂഹിക പരിഷ്കരണ പ്രസ്ഥാനങ്ങൾ രാഷ്ട്രീയ സമരങ്ങൾക്ക് വഴിമാറി കൊടുത്തപ്പോഴാണ് പരിവർത്തനം സാധ്യമായത്. വൈക്കം സത്യാഗ്രഹം മുതൽ കേരളത്തിൽ നടന്നിട്ടുള്ള സമരങ്ങളെല്ലാം രാഷ്ട്രീയ സമരങ്ങളാ യിരുന്നു. കർഷകരും തൊഴിലാളികളും വിദ്യാർത്ഥികളും വനിതകളും സാഹിത്യകാരന്മാരും അതിൽ പങ്കാളികളായിരുന്നു. ഈ സമരങ്ങളുടെ ഫലമായാണ് സാമൂഹ്യനീതി മതനിരപേക്ഷത ജനാധിപത്യം എന്നീ മൂല്യങ്ങൾ കേരളത്തിൽ പ്രചാരം നേടിയത്. ഇന്ത്യൻ ഭരണഘടന നിലവിൽ വന്നതിനുശേഷം ഈ മൂല്യങ്ങൾ ഭരണഘടനയുടെ ഭാഗമായി. സാമൂഹിക പരിഷ്കരണ സംരംഭങ്ങൾ രാഷ്ട്രീയ സമരങ്ങൾക്ക് കീഴ്പ്പെട്ടപ്പോഴാണ് മേൽപ്പറഞ്ഞ മൂല്യങ്ങൾ ജനിച്ചത്. രാഷ്ട്രീയ സമരങ്ങൾ സാമൂഹിക സംഘടനകൾക്ക് കീഴ്പ്പെട്ടാൽ മേൽപ്പറഞ്ഞ മൂല്യങ്ങൾക്ക് ഗ്ലാനി സംഭവിക്കുകയും ചെയ്യും.

    3.കേരളത്തിന്റെ വികസന മാതൃക ഇന്ത്യയിലെ മറ്റ് സംസ്ഥാനങ്ങൾക്ക് മാതൃകയാണോ.ഇതിൽ സാറിന്റെ അഭിപ്രായമെന്താണ്?

          കേരള വികസന മാതൃക മറ്റു സംസ്ഥാനങ്ങൾക്ക് മാതൃകയാണ്. അതിൻ്റെ അടിസ്ഥാന കാരണം ഭൂ ഉടമസ്ഥതയിൽ വരുത്തിയ മാറ്റമാണ്. ജന്മിത്വം ഇല്ലാതാക്കുകയും തൽഫലമായി ആ വ്യവസ്ഥ ഉല്പാദിപ്പിച്ച മൂല്യങ്ങൾ ദുർബലമാവുകയും ചെയ്തു. അധ്വാന ശക്തിയെ കെട്ടഴിച്ചു വിട്ടു. കുലത്തൊഴിൽ ഇല്ലാതായി. പകരം സാങ്കേതികവിദ്യ ഉപയോഗിക്കപ്പെട്ടു. മറ്റു സംസ്ഥാനങ്ങളിലെല്ലാം ജാതി ജന്മി വ്യവസ്ഥ മാറ്റമില്ലാതെ തുടരുന്നു. ഭൂപരിഷ്കാരം നടപ്പായിട്ടില്ല. അതുകൊണ്ടാണ് കേരളം മറ്റു സംസ്ഥാനങ്ങൾക്കു മാതൃകയാവുന്നത്.

4.ആഗോളവൽക്കരണകാലത്ത് കേരളചരിത്രം പഠിക്കപ്പെടുന്ന രീതിയിൽ എന്തെല്ലാം മാറ്റങ്ങൾ അനിവാര്യമാണ് ?

       കൊളോണിയൽ മാതൃകയിലുള്ള അധ്യയന -അധ്യാപന രീതിയാണ് കേരളത്തിൽ ഇപ്പോഴും നിലനിൽക്കുന്നത്. കേരള ചരിത്രം ഐച്ഛിക വിഷയമായി പഠിപ്പിക്കാൻ തുടങ്ങിയിട്ട് അര നൂറ്റാണ്ട് ആകുന്നതേയുള്ളൂ. അതും ഇംഗ്ലീഷിലാണ് പഠിപ്പിക്കുന്നത്. അധ്യയന മാധ്യമം മാതൃഭാഷയാകണമെന്ന് സർവ്വകലാശാലകൾക്ക് തോന്നിയിട്ടില്ല. കേരള ചരിത്രത്തിലെ ഗവേഷണ പ്രബന്ധങ്ങൾ ഇപ്പോഴും ഇംഗ്ലീഷിലാണ് തയ്യാറാക്കുന്നത്. ആഗോളവൽക്കരണം ഭരണകൂടത്തെ വികേന്ദ്രീകരിക്കുകയും സമ്പദ്ഘടനയെ കോർപ്പറേറ്റുകളിലൂടെ കേന്ദ്രീകരിക്കുകയും ചെയ്യുന്നു. വിജ്ഞാനോല്പാദനത്തിലും വിതരണത്തിലും നിലനിൽക്കുന്ന കേന്ദ്രീകരണത്തെ ദുർബലപ്പെടുത്തി വികേന്ദ്രീകരണം വിജ്ഞാനോൽപ്പാദനസമ്പ്രദായത്തിലേക്ക് ചരിത്ര പഠനം മാറേണ്ടതുണ്ട്. 

5.“വികസനത്തിന്‍റെ അന്തിമ ലക്ഷ്യം മനുഷ്യനാണ്” എന്ന നിലപാടിൽ നിന്ന് നോക്കുമ്പോൾ, കേരളത്തിന്റെ ഭാവി സാമൂഹിക പദ്ധതികൾ ഈ മൂല്യധാരയോട് എത്രമാത്രം ഒത്തുചേരുന്ന ഒന്നാണ്. ‘

       വികസനം എന്നത് മനുഷ്യ വിഭവശേഷിയുടെ വികസനമാണ്. സാങ്കേതികവിദ്യ വികസിപ്പിക്കുന്നത് മനുഷ്യനാണ്. കേരളത്തിൽ ജനിക്കുന്ന കുഞ്ഞുങ്ങൾ മുഴുവൻ പന്ത്രണ്ടാം ക്ലാസ് വരെ സൗജന്യമായിട്ടാണ് പഠിക്കുന്നത്. അതിനുശേഷം ആണ് അവർ തൊഴിൽ അന്വേഷിക്കുന്നത്. അവരിൽ മഹാഭൂരിപക്ഷവും കേരളത്തിൽ തന്നെയാണ് ജീവിക്കുന്നത്. അതിനാൽ അവരുടെ അധ്വാനശേഷിയെ (കായികവും ഭൗതികവും വൈകാരികവും) വികസിപ്പിക്കുന്നതിനാണ് മുൻഗണന നൽകേണ്ടത്. അതിനാൽ കൗമാര കാലത്ത് പഠിതാക്കൾ എത്തിച്ചേരുന്ന ഹയർ സെക്കൻഡറി വിദ്യാഭ്യാസത്തിൽ ശ്രദ്ധ കേന്ദ്രീകരിക്കണം. ഘടനാപരവും ഗുണപരവുമായ ഉടച്ചുവാർക്കലാണ് ആവശ്യം. ഉദ്യോഗസ്ഥർ, അധ്യാപകർ, ഡോക്ടർമാർ, അഭിഭാഷകർ, ന്യായാധിപന്മാർ, ബിസിനസ്സുകാർ, തൊഴിലാളികൾ, കർഷകർ, രാഷ്ട്രീയ പ്രവർത്തകർ എന്നിങ്ങനെ സമൂഹത്തിൽ നിരന്തരം പ്രവർത്തിച്ചുകൊണ്ടിരിക്കുന്നവർ എങ്ങിനെ ആയിരിക്കണം എന്ന സങ്കല്പനം ഉണ്ടാക്കുകയും അതിനനുസൃതമായ സാമൂഹിക ആസൂത്രണം തയ്യാറാക്കുകയും വേണം.

 6.പുതിയ തലമുറയ്ക്ക് കേരളത്തിന്റെ ചരിത്രത്തെയും പാരമ്പര്യത്തെയും എങ്ങനെയാണ് കൂടുതൽ ഫലപ്രദമായി പറഞ്ഞു കൊടുക്കാൻ സാധിക്കുക? ഇതിനായി പാഠ്യപദ്ധതിയിൽ എന്തൊക്കെ മാറ്റങ്ങളാണ് വരുത്തേണ്ടത്?

    ഒരു കോടിയോളം താളിയോലകൾ സംസ്ഥാന പുരാവസ്തു വകുപ്പിന്റെ ഉടമസ്ഥതയിൽ സൂക്ഷിച്ചുവച്ചിട്ടുണ്ട്. വട്ടെഴുത്ത്, കോലെഴുത്ത് തുടങ്ങിയ ലിപികളിൽ പ്രാചീന മധ്യകാല മലയാളത്തിലാണ് ഇവകൾ എഴുതിയിട്ടുള്ളത്. ഭരണകൂട സങ്കല്പം,ദർശനം,വ്യാകരണം,ഭാഷാശാസ്ത്രം,ആയുർവേദം, ജ്യോതിഷം, ഗണിതശാസ്ത്രം, തച്ചുശാസ്ത്രം മുതലായ വിഷയങ്ങളാണ്    ഇവകളിലുള്ളത്. ഈ ലിപികൾ വായിക്കാൻ അറിയാത്തതുകൊണ്ട് താളിയോലകളിലെ ഉള്ളടക്കം പഠിതാക്കൾക്ക് ലഭ്യമല്ല. പിന്നെപ്പിന്നെ നമ്മൾ കേരള ചരിത്രം പഠിക്കും. ഭാഷാ ശാസ്ത്രവും ലിപി ചരിത്രവും  ശാസ്ത്രവും പഠിപ്പിക്കാതെ എങ്ങനെയാണ് നല്ല പഠിതാക്കളും അധ്യാപകരും ആകാൻ സാധിക്കുക.

       കേരളത്തെക്കുറിച്ച് വിദേശികൾ എഴുതിയ കൃതികൾ അവരുടെ രാജ്യങ്ങളിൽ കിടപ്പുണ്ട്. നെതർലാൻഡിൽ കേരളത്തെ സംബന്ധിച്ച ആയിരക്കണക്കിന് രേഖകൾ ഉണ്ട്. അവർ കേരള സർക്കാരിന് കൈമാറാം എന്ന് വെച്ച് സർക്കാർ സമ്മതിച്ചിട്ടുണ്ട്. എന്നാലും പതിനേഴാം നൂറ്റാണ്ടിലെ ഡച്ചുഭാഷ പഠിക്കാതെ കേരളീയർക്ക് അതുകൊണ്ട് പ്രയോജനമില്ല. ഇതുപോലെ പോർച്ചുഗലിലും ഫ്രാൻസിലും ഇംഗ്ലണ്ടിലും ഗൾഫ് രാജ്യങ്ങളിലും ചൈനയിലും രേഖകൾ കാണും. അവ പഠിക്കണം. രേഖകളും തെളിവുകളും ഏതായിരുന്നാലും അവയെ നിഷ്കൃഷ്ടമായി പഠിക്കണമെങ്കിൽ സിദ്ധാന്തപരമായ ശക്തിയുണ്ടാവണം. ചരിത്രരചനയിലെ നൂതന പ്രവണതകൾ സ്വായത്തമാക്കാതെ ഇത്തരം പഠനങ്ങൾ മുന്നോട്ടുകൊണ്ടുപോകാൻ കഴിയില്ല. ഇതിനു നേതൃത്വം കൊടുക്കേണ്ടത് അധ്യാപകരാണ്. അവരുടെ ശക്തിയാണ് പാഠ്യപദ്ധതിയുടെയും പഠനത്തിന്റെയും ശക്തി.

7.കേരളത്തിലെ ഗവേഷണ മേഖലയുടെ നിലവാരം അന്തർദേശീയ തലവുമായി താരതമ്യം ചെയ്യുമ്പോൾ എവിടെ നിൽക്കുന്നു? ഈ മേഖല മെച്ചപ്പെടുത്താൻ എന്തെല്ലാം നടപടികളാണ് സ്വീകരിക്കേണ്ടത്?

        കേരള ചരിത്രത്തിലെ ഗവേഷണം ആണ് ഉദ്ദേശിച്ചതെങ്കിൽ അതിന് ബഹുഭാഷാ പാണ്ഡിത്യം ആവശ്യമാണ്. മലയാളം, ഇംഗ്ലീഷ്, തമിഴ്, സംസ്കൃതം എന്നീ വിഷയങ്ങളിൽ സാമാന്യ ജ്ഞാനം ഉണ്ടാവണം. മറ്റു സാമൂഹിക ശാസ്ത്ര വിഷയങ്ങൾക്കും ഇത് ബാധകമാണ്. രീതിശാസ്ത്രപരമായ ധാരണ ഉണ്ടാവണം. ഉദരനിമിത്ത ഗവേഷണമാണ് കൂടുതൽ നടക്കുന്നത്. അത് ഗവേഷണത്തിന്റെ നിലവാരത്തെ ബാധിക്കുന്നുണ്ട്. ഓരോ വിഷയത്തെയും പ്രത്യേകമായി പരിശോധിച്ചു മാത്രമേ ഗവേഷണത്തിന്റെ സർവ്വദേശീയ നിലവാരവുമായി താരതമ്യം ചെയ്യാൻ കഴിയുകയുള്ളൂ. അതിനാൽ ഭാഷാപരവും രീതിശാസ്ത്രപരവുമായ ശാക്തീകരണം ആവശ്യമാണ്.

8.വിദ്യാഭ്യാസ-സാമൂഹിക മേഖലകളിൽ അടുത്ത 25 വർഷത്തിനിടെ കേരളം നേരിടാൻ പോകുന്ന പ്രധാന വെല്ലുവിളികൾ എന്തൊക്കെ ആയിരിക്കുമെന്നാണ് അങ്ങ് കരുതുന്നത്?

          കൃഷിയെയും വ്യവസായത്തെയും തമ്മിൽ ബന്ധിപ്പിക്കാൻ കേരളത്തിന് കഴിഞ്ഞിട്ടില്ല എന്നതാണ് നമ്മുടെ ദൗർബല്യം. വികസന വക്താക്കൾ പറയുന്നത് വ്യാവസായിക സാങ്കേതിക വികസനത്തിന്റെ കാര്യങ്ങൾ മാത്രമാണ്. കാർഷിക വികസനത്തിന്റെ കാര്യം മുഖ്യ പരിഗണന വിഷയമാകുന്നില്ല. സ്റ്റാർട്ടപ്പ് പരിപാടികളിൽ പോലും കൃഷി മുഖ്യ വിഷയമായിട്ടില്ല. കാർഷിക മേഖലയിൽ തൊഴിലാളിദാരിദ്ര്യം രൂക്ഷമാണ്. മറ്റു മേഖലകളിൽ തൊഴിൽരഹിതരുടെ എണ്ണം അമ്പരപ്പിക്കുന്നതാണ്. എംപ്ലോയ്മെൻറ് എക്സ്ചേഞ്ചിൽ പേര് രജിസ്റ്റർ ചെയ്ത തൊഴിൽരഹിതരുടെ എണ്ണം 45 ലക്ഷമാണ്. തൊഴിൽ വകുപ്പിന്റെ കണക്കനുസരിച്ച് മുപ്പതുലക്ഷം ഇതര സംസ്ഥാന തൊഴിലാളികൾ ഇവിടെ ജോലി ചെയ്യുന്നു. ഈ അന്തരം കുറച്ചു കൊണ്ടുവന്നാൽ    കേരള വികസനത്തിന്റെ രൂപം മാറും. മുൻകാലത്ത് പ്രവാസികളുടെ സമ്പാദ്യം കേരള വികസനത്തിന് ഗുണകരമായിരുന്നു. എന്നാൽ ഇന്ന് അങ്ങനെയല്ല. ഓരോരോ രാജ്യത്തെയും നിയമം അവിടുത്തെ സമ്പദ്ഘടനയെ ശക്തിപ്പെടുത്തുന്നതിന് വേണ്ടിയുള്ളതാണ്. സമ്പാദ്യത്തിന്റെ ഒരു നിശ്ചിത ശതമാനം അവിടെത്തന്നെ ചിലവഴിക്കണമെന്ന് വ്യവസ്ഥയുണ്ട്. അതിനാൽ പുതിയ തലമുറ വിദേശത്തുപോയി സമ്പാദിക്കുന്ന പണം കേരളത്തിന് ലഭിക്കുകയില്ല. കൃഷി വ്യവസായ സമന്വയം ഭാവി കേരള വികസനത്തിന്റെ  മുന്നുപാധിയാണ്  . അതിനുതകുംവിധം വിദ്യാഭ്യാസത്തിൻ്റെ  ഘടനയിലും ഉള്ളടക്കത്തിലും മാറ്റം വരുത്തണം.

9. പ്രാദേശിക ഭാഷയിൽ പഠനം സാധ്യമാക്കണമെന്ന് സാറ് പറഞ്ഞിട്ടുണ്ടല്ലോ? ആദിവാസികൾ പോലെയുള്ളവരുടെ കാര്യത്തിൽ അത് ശരിയാണോ? അവരെ മാനകഭാഷയായ മാതൃഭാഷയിലേക്ക് കൊണ്ടുവരികയല്ലേ വേണ്ടത്?

           മാതൃഭാഷയിലൂടെയുള്ള വിദ്യാഭ്യാസമാണ് അംഗീകൃതതത്വം. എന്നാൽ കേരളത്തിൽ മലയാളം മാത്രമല്ല മാതൃഭാഷ. കേരളീയരായ 39 ആദിവാസി-ഗോത്രവർഗ്ഗ വിഭാഗങ്ങൾ ആണുളുണ്ട്. ഓരോ ഗോത്രത്തിനും അതിൻ്റെ മാതൃഭാഷയുണ്ട്. എന്നാൽ ലിപിയില്ല. എഴുതി സൂക്ഷിക്കേണ്ട ആവശ്യമില്ലാത്തതിനാൽ ലിപി വികസിച്ചിട്ടില്ല. ഗോത്രവർഗ്ഗത്തിൽ പെട്ടവർ പഠിതാക്കളായി എത്തുമ്പോൾ അവർക്ക് അവരുടെ ഭാഷയിലൂടെയാണ് വിദ്യാഭ്യാസം നൽകേണ്ടത്. അവരുടെ മാതൃഭാഷയെയും മലയാളത്തെയും തമ്മിൽ ബന്ധിപ്പിച്ചുകൊണ്ടുള്ള പഠന- ബോധന രീതിയാണ് അവലംബിക്കേണ്ടത്. ഇതേപോലെ കടലോരത്ത് ഭാഷയുണ്ട്. അവരെയും ഉൾക്കൊണ്ടു കൊണ്ടുള്ള വിദ്യാഭ്യാസത്തിന് മുൻഗണന നൽകണം.

10. കേരള സംസ്ഥാനം അതിന്റെ 70 വർഷത്തെ ചരിത്രത്തിൽ വരുത്തിയ ഏറ്റവും വലിയ ചരിത്രപരമായ പിഴവുകളായി താങ്കൾ കാണുന്നത് എന്തൊക്കെയാണ്? അത് ഒഴിവാക്കാൻ കഴിയുമായിരുന്നോ?

       കേരള വികസനത്തിന് അടിത്തറപാകിയത് ഭൂപരിഷ്ക്കാരമായിരുന്നു. കമ്മ്യൂണിസ്റ്റ് മന്ത്രിസഭ പാസാക്കിയ കാർഷിക       നിയമപ്രകാരം പാട്ടക്കുടിയാന് കൈവശ ഭൂമിയിൽ ഉടമസ്ഥാവകാശം കിട്ടി. എന്നാൽ ഭൂരഹിതരായ കർഷക തൊഴിലാളികൾക്ക് ഭൂമി കിട്ടിയില്ല. കൈവശ ഭൂമിക്ക് പരിധി നിശ്ചയിക്കുകയും അതിനപ്പുറം ഉള്ളത് മിച്ച ഭൂമിയായി പ്രഖ്യാപിച്ച് സർക്കാർ ഏറ്റെടുത്ത് ഭൂരഹിതർക്ക് വിതരണം ചെയ്യണമെന്നായിരുന്നു പ്രഖ്യാപനം. എന്നാൽ അത് കൃത്യമായി നടന്നില്ല. കിട്ടിയ ഭൂമി വീട് വയ്ക്കാൻ മാത്രമേ പ്രയോജനപ്പെട്ടുള്ളൂ. കർഷക തൊഴിലാളികളിൽ മഹാഭൂരിപക്ഷവും ദളിത് വിഭാഗത്തിൽപ്പെട്ടവരായിരുന്നു. അതിനാൽ പ്രശ്നം രൂക്ഷമായി.    പരിഹരിക്കുന്നതിൽ കേരള സർക്കാർ പരാജയപ്പെട്ടു.

        സമ്പൂർണ്ണ സാക്ഷരത കൈവരിച്ച കേരളത്തിൽ വിദ്യാഭ്യാസത്തിനാണ് മുൻഗണന. എന്നാൽ വിദ്യാഭ്യാസം കൊളോണിയൽ മാതൃകയിൽ തന്നെ തുടരുകയാണ്. അത് മാറ്റാൻ കേരളത്തിനായില്ല. അത്തരത്തിലൊരു ചിന്ത ഇതേവരെ ഉണ്ടായിട്ടുമില്ല. മെക്കാളേയിസ്റ്റ് , മെറ്റീരിയലിസ്റ്റ് എന്നീ       പേരുകൾ നൽകി കൊളോണിയൽ വിദ്യാഭ്യാസത്തെ ഉച്ചാടനം ചെയ്യാൻ കേന്ദ്രസർക്കാർ ശ്രമിക്കുമ്പോൾ അതിനെ എതിർക്കുന്ന കേരളം കൊളോണിയൽ സമ്പ്രദായത്തെ സ്വീകരിക്കുകയല്ല ചെയ്യുന്നത്. അപ്പോൾ കേരളത്തിൻറെ ബദൽ എന്താണ്? അത് കണ്ടെത്തുകയാണ് അടിയന്തിര കടമ. കേരളത്തിലെ വിദ്യാഭ്യാസ സമരങ്ങളെല്ലാം തന്നെ അധ്യാപകരുടെ സാമ്പത്തിക നേട്ടത്തിനു വേണ്ടിയുള്ളതായിരുന്നു. വിദ്യാർത്ഥി സമരങ്ങളെല്ലാം അവരുടെ ജനാധിപത്യ അവകാശ സംരക്ഷണത്തിനു വേണ്ടി ഉള്ളതും. ഒരു ഇടതു    വേണ്ടിയുള്ള സമരം ഇരുകൂട്ടരും ചെയ്തില്ല.

11.പുതിയ തലമുറയുടെ വിദേശത്തേക്കുള്ള കൂടുമാറ്റത്തെ താങ്കൾ എങ്ങനെയാണ് വിലയിരുത്തുന്നത്.? കേരളത്തിൻ്റെ ഭാവിയിൽ ഈ  പ്രവണത പ്രത്യാഘാതങ്ങൾ ഉണ്ടാക്കുമെന്നു കരുതുന്നുണ്ടോ?

      വിദേശരാജ്യങ്ങളിലേക്ക് വിദ്യാർഥികൾ മുമ്പും പോയിരുന്നു. പോകാൻ ശ്രമിക്കുന്നവരുടെ എണ്ണം വർദ്ധിച്ചപ്പോൾ വിദ്യാർത്ഥികളുടെ എണ്ണത്തിലും വർദ്ധനവ് ഉണ്ടായി. അത് സ്വാഭാവികമാണ്. രക്ഷിതാക്കളുടെ സമ്പാദ്യം വിദേശരാജ്യങ്ങളിലെ കൊഴുക്കുന്നു എന്നതാണ് അതിൻറെ സാമ്പത്തിക വശം. അത് പണമായോ വിദഗ്ധ തൊഴിലായ കേരളത്തിലേക്ക് തിരികെ വരുന്നില്ല എന്നതാണ് ഗുരുതരം.

      എന്തിനാണ് വിദ്യാർഥികൾ വിദേശത്തേക്ക് പോകുന്നത്? ഇവിടുത്തെ വിദ്യാഭ്യാസം ഗുണമേന്മ ഇല്ലാത്തത് ആവശ്യക്കാർക്ക് ഉപയോഗമില്ലാത്തതും കൊണ്ടല്ലേ? വിദേശ സർവ്വകലാശാലകളുടെ ക്യാമ്പസുകൾ കേരളത്തിൽ ആരംഭിക്കുന്നതിന് നമ്മൾ സ്വാഗതം ചെയ്യുന്നതിന്റെ യുക്തി എന്താണ്? ഈ രണ്ടും വിരൽചൂണ്ടുന്നത് നമ്മുടെ വിദ്യാഭ്യാസത്തിൻറെ നിലവാരമില്ലായ്മയിലേക്കാണ്. ഗുണമേന്മയുള്ള നൂതന വിദ്യാഭ്യാസം ഇവിടെ നൽകാൻ കഴിഞ്ഞാൽ വിദ്യാർഥികൾ വിദേശത്തേക്ക് പോകുകയുമില്ല, വിദേശ സർവകലാശാലകളുടെ ക്യാമ്പസുകൾ ഇവിടെ വരികയുമില്ല. ഘടനാപരമായും ഗുണപരമായും നമ്മുടെ വിദ്യാഭ്യാസത്തെ പുനഃസംഘടിപ്പിച്ചാൽ തീരാവുന്ന പ്രശ്നമേ ഇവിടുള്ളൂ.