ഒഴുകാത്ത പുഴയുടെ ഒച്ചകൾ

ഡോ.ലാലു വി.

പ്രബന്ധസംഗ്രഹം  

                വിശ്വപ്രസിദ്ധ എഴുത്തുകാരൻ ലിയോ ടോൾസ്റ്റോയിയുടെ ദാമ്പത്യ ജീവിത ത്തിലെ പൊരുത്തങ്ങളും പൊരുത്തക്കേടു കളും ദൗർബല്യങ്ങളും പ്രണയവും നിരാശ യും  നിസ്സഹായതയും പ്രമേയമാക്കുന്ന ചന്ദ്രമതിയുടെ നോവലാണ് 'ഒഴുകാതെ ഒരു പുഴ'. കെട്ടി നിൽക്കുന്ന ജലം പോലെ ഒഴുക്ക് തടയപ്പെട്ട ഒരു പുഴയായി കഴിയേണ്ടി വന്ന സോഫിയ ടോൾസ്റ്റോയ് എന്ന സോണിയയു ടെ കഥയാണ്  ഈ നോവൽ പറയുന്നത്. ടോൾസ്റ്റോയിക്ക്  വേണ്ടി തന്റെ നൈസർ ഗിക കഴിവുകളും സ്വാഭാവികമായ പെരു മാറ്റവും അടക്കി നിർത്തി കഴിയേണ്ടിവന്ന സോഫിയയുടെ  ജീവിതമാണ് നോവലിൽ ആവിഷ്കരി ക്കുന്നത്. തന്റെ ആഗ്രഹങ്ങ ളെല്ലാം ഉള്ളിൽ ഒതുക്കി ടോൾസ്റ്റോയിയുടെ സർഗാത്മക ജീവിതത്തിനും കുടുംബ ജീവി തത്തിനും കരുത്തുപകർന്ന സോഫിയയുടെ ജീവിത നൊമ്പരങ്ങളാണ്  നോവലിലൂടെ വെളിവാകുന്നത്. ഒരർത്ഥത്തിൽ സോഫിയ അനുഭവിക്കുന്ന വേദനകൾ ദാമ്പത്യ ജീവിത ത്തിൽ മിക്ക സ്ത്രീകളും അനുഭവിക്കുന്നത് തന്നെയാണ്. ഭർത്താവിനും കുടുംബത്തിനും വേണ്ടി സ്വന്തം ജീവിതം എരിച്ചു തീർക്കുന്ന എല്ലാ സ്ത്രീകളുടെയും പ്രതിനിധിയാണ് സോഫിയ ടോൾസ്റ്റോയ്. ”ഒഴുകാതെ ഒരു പുഴ” എന്ന നോവലിനെ പഠനവിധേയമാക്കി വിശ്വപ്രസിദ്ധ സാഹിത്യ കാരൻ ലിയോ ടോൾസ്റ്റോയിയുടെ ജീവിത ത്തിൻറെ പുനർ വായനയാണ് ഈ പ്രബന്ധത്തിലൂടെ നിർവഹിക്കുന്നത്.

താക്കോൽവാക്കുകൾ :ഒഴുകാതെ ഒരു പുഴ,സ്ത്രീസ്വാതന്ത്ര്യം, പുരുഷമേധാവിത്വം, വ്യക്തിജീവിതം, കുടുംബജീവിതം, ദാമ്പത്യ ജീവിതം,ചൂഷണം, അവഗണന, സർഗ്ഗാത്മ കത.

            ലോകപ്രശസ്ത എഴുത്തുകാരൻ ലിയോ ടോൾസ്റ്റോയിയുടെ ഭാര്യ സോഫിയ ടോൾസ്റ്റോയിയുടെ ജീവിതാനുഭവങ്ങളും വീക്ഷണങ്ങളും അടിസ്ഥാനമാക്കിയുള്ള ഒരു ജീവചരിത്രനോവലാണ് 'ഒഴുകാതെ ഒരു പുഴ'എന്ന ചന്ദ്രമതിയുടെ നോവൽ. ടോൾസ്റ്റോയി എന്ന എഴുത്തുകാരന്റെ ജീവിതവും രചനകളും സൗഹൃദവും പ്രണയവും ഇഷ്ടങ്ങളും ആദർശങ്ങളും ദർശനങ്ങളും  പുനർവായനയ്ക്ക് വിധേയമാക്കുകയാണ്  ചന്ദ്രമതി ഈ നോവലിലൂടെ. അനേകം കഴിവുകൾ ഉണ്ടായിട്ടും അതെല്ലാം ഉള്ളിലൊതുക്കി, ടോൾസ്റ്റോയിയുടെ ഭാര്യ എന്ന നിലയിൽ അദ്ദേഹത്തിൻറെ കുഞ്ഞുങ്ങളെ പ്രസവി ക്കാനും കുടുംബത്തെയും കുട്ടികളെയും സംരക്ഷിക്കാനും വേണ്ടി ജീവിതം മാറ്റിവ യ്ക്കുകയും, ഭർത്താവിൻറെ കൃതികളുടെ പകർത്തി എഴുത്തുകാരിയായി ജീവിക്കു കയും ചെയ്ത സോഫിയയിലൂടെ ടോൾ സ്റ്റോയ് എന്ന എഴു ത്തുകാരന്റ മറുവശം കാട്ടിത്തരികയാണ് ഈ നോവൽ.

                      ലോകപ്രശസ്തനായ ഒരു പ്രതിഭാശാലിയുടെ ഭാര്യ എന്നതിലുപരി സ്വന്തമായ വ്യക്തിത്വവും കഴിവുകളും ഉള്ള സ്ത്രീയായിരുന്നു സോഫിയ. എന്നാൽ ടോൾസ്റ്റോയിയുടെ പ്രശസ്തിയുടെ തണ ലിൽ അവരുടെ ജീവിതവും ത്യാഗങ്ങളും പലപ്പോഴും വിസ്മരിക്കപ്പെടുകയോ തെറ്റിദ്ധ രിക്കപ്പെടുകയോ ചെയ്തു. ഒരു ഭാര്യ എന്ന നിലയിൽ സോഫിയ അനുഭവിച്ച കഷ്ടപ്പാ ടുകളും വികാരങ്ങളും പ്രണയവും പരിഭവ ങ്ങളും നൈരാശ്യവും ആണ് നോവൽ ആവിഷ്കരിക്കുന്നത്. 48 വർഷം നീണ്ടുനിന്ന ടോൾസ്റ്റോയി – സോഫിയ ദാമ്പത്യത്തിലെ സങ്കീർണതകളാണ് നോവൽ പ്രധാനമായും ചർച്ച ചെയ്യുന്നത്. ടോൾസ്റ്റോയിയുടെ സാഹിത്യ ജീവിതത്തിന്  സോഫിയ നൽ കിയ  പിന്തുണയും ത്യാഗവും വളരെ വലുതാ യിരുന്നു. തൻറെ കഴിവുകൾ ഭർത്താവ് അംഗീകരിക്കാത്തതിലെ നിരാശയും വാശി യും അവർക്കുണ്ടായിരുന്നു.

           നോവലിന്റെ പേര് സൂചിപ്പിക്കു ന്നതുപോലെ 'ഒഴുകാതെ ഒരു പുഴ' പോലെ യുള്ള ജീവിതമായിരുന്നു സോഫിയയുടേത്. തൻറെ ചേച്ചി ആരാധിച്ച് സ്നേഹിച്ച് വിവാ ഹം കഴിക്കാൻ കൊതിച്ച പുരുഷനെ പിതാ വിൻറെ എതിർപ്പ് മറികടന്ന് സോഫിയ വിവാ ഹം കഴിച്ചു. ടോൾസ്റ്റോയിയുടെ പൂർവ്വകാല ത്തിലെ അരാജകജീവിതത്തെക്കുറിച്ചുള്ള  തുറന്നുപറച്ചിലുകളും പ്രായവ്യത്യാസവും ഒന്നും കണക്കിലെടുക്കാതെ അയാളോടുള്ള ആരാധന കൊണ്ടും പ്രണയം കൊണ്ടും അവൾ ടോൾസ്റ്റോയിയെ തെരഞ്ഞെടുത്തു. ആദ്യകാലങ്ങളിൽ സന്തോഷപ്രദമായി ജീവി തം മുന്നോട്ടു പോയെങ്കിലും തുടർന്ന് അസ്വാ രസ്യങ്ങൾ ഉടലെടുക്കുന്നു. ടോൾസ്റ്റോയി യ്ക്ക് വേണ്ടി തൻറെ സർഗാത്മകകഴിവു കളും സ്വാഭാവികമായ പെരുമാറ്റവും അട ക്കി നിർത്തേണ്ടി വന്ന സോഫിയയെ, ടോൾ സ്റ്റോയിയും മക്കളും അദ്ദേഹത്തിൻറെ ആരാധകരും തിരിച്ചറിയുന്നില്ല. 'യുദ്ധവും സമാധാനവും', 'അന്നാകരിനീന'തുടങ്ങിയ നോവലുകൾ അനവധി തവണ പകർത്തി എഴുതിയിട്ടും തൻറെ സംഭാഷണങ്ങളും ഡയറിക്കുറിപ്പിലെ വാചകങ്ങളും രചനക ളിൽ പലപ്പോഴും ഉപയോഗിച്ചിട്ടും അതൊ ന്നും അംഗീകരിക്കു വാനോ തുറന്നു പറയാ നോ ടോൾസ്റ്റോയ് തയ്യാറായിരുന്നില്ല.

                ഭാര്യയെ കുറിച്ചുള്ള ടോൾസ്റ്റോയി യുടെ നിരീക്ഷണങ്ങൾ എന്ന നിലയിൽ വ്യാ ഖ്യാനിക്കപ്പെട്ട 'ക്രൂയിറ്റർ സോണറ്റ്' എന്ന കൃതിക്ക് ബദലായി സോണിയ എഴുതിയ 'ആരുടെ തെറ്റ്'എന്ന് നോവൽ അവൾക്ക് പുറംലോകം കാണിക്കാൻ കഴിയുന്നില്ല. 'വാക്കുകളില്ലാത്ത സംഗീതം' എന്ന അവളുടെ കൃതിയുടെ അവസ്ഥയും ഇതുതന്നെ യായിരുന്നു. പാചകത്തിനും പ്രസവത്തിനും തുന്നലിനും വീട്ടുകാരുടെ ക്ഷേമത്തിനും വേണ്ടി പ്രവർത്തിക്കുന്ന തിനപ്പുറം താൻ ഒന്നും അർഹിക്കുന്നില്ല എന്നവൾ വേദന യോടെ തിരിച്ചറിയുന്നു. സ്ത്രീയെ ഒരു ഭോഗവസ്തുവായി മാത്രം കാണുന്ന,സ്വന്തം ഭാര്യയുടെ അധ്വാനത്തെ വകവയ്ക്കാത്ത ഒരു പുരുഷാധിപത്യ ബോധം ടോൾസ്റ്റോയിയെ നയിക്കുന്നു. എഴുത്തുകാരൻ എന്ന നിലയിൽ അയാളുടെ ചൈതന്യമുള്ള ഭാഷയുടെ ആരാധികയായ അവൾ അയാളുടെ അവഗണനകളെയും അത് നൽകുന്ന വേദനയേയും ഉള്ളിൽ ഒതുക്കി അയാളെ  പ്രണയിച്ചു. ടോൾസ്റ്റോ യിയുടെ ഗൃഹാന്തരീക്ഷത്തിലെ അസ്വസ്ഥ തകളും ദുഃഖകരമായ അവസ്ഥകളും വളരെ സൂ ക്ഷ്മതയോടെ ചന്ദ്രമതി ആവിഷ്കരി ക്കുന്നു.

           'എല്ലാ സന്തുഷ്ട കുടുംബങ്ങളും ഒരുപോലെയാണ്. എല്ലാ അസന്തുഷ്ട കുടുംബങ്ങളും ഓരോ തരത്തിൽ അസ ന്തുഷ്ടവുമാണ്'. എന്ന അന്നാ കരിനീന യിലെ വാചകം പോലെയാണ് ടോൾസ്റ്റോ യിയുടെ കുടുംബജീവിതം. അദ്ദേഹത്തെ കഠിനമായി ആരാധിക്കു മ്പോഴും അദ്ദേഹ ത്തിൻറെ ജീവിതരീതികളോട് പൊരുത്ത പ്പെടാൻ സോഫിയക്ക് കഴിയുന്നില്ല. ലോക ത്തിൻറെ മുന്നിൽ നിഷ്കളങ്കനും ആദർശ വാനും പരഹൃദയജ്ഞാനിയും  ആയ  ടോൾ സ്റ്റോയ് കുടുംബജീവിതത്തിൽ നേർ വിപ രീതമായി നിലകൊള്ളുന്നു. തന്റെ ഭാര്യയ്ക്ക് ഇഷ്ടമല്ലാത്ത കാര്യങ്ങൾ ആവർത്തിച്ച് ചെയ്യാൻ അയാൾക്ക് ഒരു മടിയുമില്ല. ചേർത്കോവ് എന്ന അദ്ദേഹത്തിൻറെ ഒരു ആരാധകന്റെ ചെയ്തികൾ ടോൾസ്റ്റോ യിയുടെ കുടുംബ ജീവിതത്തിൽ വലിയ അസ്വസ്ഥതകൾ സൃഷ്ടിക്കുന്നു. സോഫിയ, ടോൾസ്റ്റോയിയെ തിരുത്താൻ ശ്രമിക്കുമ്പോ ഴെല്ലാംഅയാൾ കൂടുതൽ കൂടുതൽ ചേർ ത്കോവിൻറെ പക്ഷത്തേക്ക് ചായുന്നു. ടോൾസ്റ്റോയിയ്ക്ക്  സോഫിയയോടുള്ള നീരസങ്ങളെ വലുതാക്കി അയാൾ അദ്ദേഹ ത്തിനുമേൽ ആധിപത്യം സ്ഥാപിക്കുന്നു. അദ്ദേഹത്തിൻറെ പെൺമക്കളെ തൻറെ വരുതിയിലാക്കുന്നു. വീട്ടിൽ ചാരപ്പണി ക്കായി ആൾക്കാരെ നിയോഗിക്കുന്നു. ആൺമക്കളും സോഫിയക്ക് ആശ്വാസ ത്തിനെത്തുന്നില്ല.അവർ പണം ലഭിക്കാനു ള്ള ഒരു മാർഗ്ഗം മാത്രമായി അവരെ കണ്ടു. അവളുടെ സർഗ്ഗവാസനകളെയും സംഗീത താൽപര്യത്തെയും അവർ അനുകൂലിക്കു ന്നില്ല. സാധാരണക്കാരിലേക്ക് എത്തിക്കാൻ എന്ന വ്യാജേന ടോൾസ്റ്റോയിയുടെ പുസ്ത കങ്ങളുടെ പ്രസിദ്ധീകരണാവകാശം ചേർ ത്കോവ് സ്വന്തമാക്കുന്നു. മക്കളുടെ വിദ്യാ ഭ്യാസം, ആരോഗ്യം കുടുംബത്തിൻറെ സംര ക്ഷണം എന്നിവയ്ക്കായി നിരന്തരം ടോൾ സ്റ്റോയിയോടും ചേർത്കോവിനോടും സോഫിയക്ക് ഏറ്റുമുട്ടേണ്ടി വരുന്നു.

             വെറുമൊരു പകർത്തി എഴുത്തു കാരിയും സ്ഥിരപ്രസവക്കാരിയുമായി അധപ്പതിച്ചു പോകുന്നുവല്ലോ താൻ എന്ന ചിന്ത അവളെ  ദുഃഖിപ്പിക്കുന്നു. മൗലികമായി എന്തെങ്കിലും എഴുതണമെന്ന് അവൾ ആഗ്ര ഹിക്കുന്നു. സ്ത്രീക്ക് സാഹിത്യലോകത്ത് സ്ഥാനമില്ലെന്ന് വിശ്വസിക്കുന്ന ഭർത്താവിൽ നിന്ന് പ്രോത്സാഹനങ്ങളോ സഹായമോ അ വൾക്ക് ലഭിക്കുന്നില്ല. പെണ്ണ്, ഭാര്യയും അമ്മ യും വീട് നോക്കുന്നവളുമായി കഴിയേണ്ടവ ളാണെന്ന് വഴക്കിനിടയിൽ ടോൾസ്റ്റോയ് വിളിച്ചു പറയുന്നുമുണ്ട്. പുരുഷനെ ആരും നിയന്ത്രിക്കാൻ പാടില്ല അവർ ഇഷ്ടമുള്ള തൊക്കെ ചെയ്യും. ഇത്തരം നിലപാടുകളോട് യോജിക്കാൻ  സോഫിയക്ക് കഴിയുന്നില്ല. 'കൂലി കൊടുത്താൽ കിട്ടുന്ന ഒരു പകർപ്പെ ഴുത്തുകാരിയുടെ ജോലി മാത്രമേ നീ ചെ യ്തിട്ടുള്ളൂ','നിന്നെയും നിൻറെ മക്കളെയും കളഞ്ഞിട്ട് ദൂരെ എവിടെയെങ്കിലും പോയി സ്വസ്ഥമായിരുന്നു ജോലി ചെയ്യാനാണ് എൻറെ ആഗ്രഹം' ഇത്തരത്തിലുള്ള ടോൾ സ്റ്റോയിയുടെ പല സംഭാഷണങ്ങളും അവ ളെ കുത്തിനോവിക്കുന്നു. സാഷയ്ക്ക് ശേഷം കുഞ്ഞിനെ വേണ്ട എന്ന് തീരുമാ നിച്ചുറപ്പിച്ച സോണിയ വീണ്ടും ഗർഭിണി യായപ്പോൾ ഇങ്ങനെ ചിന്തിക്കുന്നു. 'എനി ക്ക് ആകെ വേണ്ടത് സ്നേഹവും ദയയും, അദ്ദേഹം തരുന്നില്ല. ഞാൻ ചവിട്ടി അരയ്ക്ക പ്പെട്ട വെറുമൊരു പുഴു മാത്രമാണ്. ആർ ക്കും വേണ്ടാത്ത ആരും സ്നേഹിക്കാത്ത ഒരു പ്രയോജനവുമില്ലാത്ത ജീവി. രാവിലെ മുതൽ ഛർദ്ദിക്കാൻ തുടങ്ങുന്ന വലിയ വയറും കുറെ ദേഷ്യവും ഉള്ള ജീവി'. തൻറെ പ്രതിഷേധത്തിന്റെ സ്വരം ഡയറിക്കുറിപ്പായി അവൾ ഇങ്ങനെ എഴുതുന്നു. 'എന്തുകൊ ണ്ടാണ് പ്രശസ്തരായ എഴുത്തുകാരികളോ കലാകാരികളോ  ഉണ്ടാകാത്തത് കാരണം ഊർജ്ജസ്വലയായ ഒരു സ്ത്രീയുടെ എല്ലാ വികാരങ്ങളും കഴിവുകളും കുടുംബം പിടിച്ചു വയ്ക്കുന്നു. കുട്ടികളെ പ്രസവിച്ച് വിദ്യാഭ്യാ സം നൽകി വളർത്തി കഴിയുമ്പോൾ അവളു ടെ സർഗാത്മകദാഹങ്ങൾ ഉണരുന്നു. പക്ഷേ അപ്പോഴേക്കും സമയം ഒരുപാട് വൈകി പോകും'.

          വിശാലമായ ലോകവീക്ഷണം ഉള്ള ടോൾസ്റ്റോയിയെ, ഭർത്താവിനെയും കുട്ടിക ളെയും വീടിനെയും മാത്രം ലോകമായി കാ ണുന്ന സോഫിയക്ക് ഉൾക്കൊള്ളാനാവുന്നി ല്ല. സ്വന്തം കുടുംബത്തോട് നീതിപുലർത്താ തെയാണ് അവശജനങ്ങൾക്കും പീഡിതർ ക്കും  വേണ്ടി ടോൾസ്റ്റോയി നിലകൊള്ളു ന്നത്. ടോൾസ്റ്റോയിയുടെ മഹത്വത്തിനും ഉയർച്ചകൾക്കും പിന്നിൽ എല്ലായ്പ്പോഴും സോഫിയയുടെ പിന്തുണ ഉണ്ടായിരുന്നു വെങ്കിലും, 48 വർഷത്തെ ദാമ്പത്യജീവിത ത്തിനൊടുവിൽ ടോൾസ്റ്റോയിയുടെ അന്ത്യ സമയത്തുപോലും, അദ്ദേഹത്തിന് ബോധം മറയുന്നതിന് മുമ്പ് അരികിലെത്താൻ ചേർ ത്കോവ് ഉൾപ്പെടെയുള്ള അനുയായികളും സ്വന്തം മക്കളും സോഫിയയെ അനുവദിക്കു ന്നില്ല. മരണം എത്തുന്നതിനുമുമ്പ് മാത്ര മാണ് സോണിയയ്ക്ക് ഭർത്താവിനെ കാ ണാൻ അനുവാദം ലഭിക്കുന്നത്. 'ഞാൻ അങ്ങയെ അല്ലാതെ ആരെയും സ്നേഹിച്ചി ട്ടില്ല'എന്നിങ്ങനെ ടോൾസ്റ്റോയിയുടെ അവ സാനശ്വാസം എടുക്കും വരെ സോണിയ പറഞ്ഞുകൊണ്ടേയിരുന്നു.

            നോവലിസ്റ്റും സോഫിയയും തമ്മിലുള്ള സംഭാഷണത്തിലൂടെയാണ് നോവലിന്റെ അവസാനഭാഗങ്ങൾ മുന്നേറു ന്നത്. ടോൾസ്റ്റോയി എന്ന ഭർത്താവ് ഒരു അടിക്കുറിപ്പിന്റെ സ്ഥാനം പോലും നൽകാ ത്ത, തന്നെ തേടി വന്നതിൽ സോഫിയ നോവലിസ്റ്റിനോട്  നന്ദി പറയുന്നു. 'പക്ഷേ ലിയോയുടെ മരണത്തിൽ നീ എൻറെ കഥ നിർത്തി. അതിനു ശേഷം ഞാൻ ജീവിച്ച ഒൻപതു വർഷങ്ങളെ നിനക്ക് എങ്ങനെ ശ്രദ്ധിക്കാതിരിക്കാൻ കഴിഞ്ഞു.ഭർത്താവ് മരിച്ചാൽ സ്ത്രീയുടെ ഒരു വലിയ ഭാഗം അടർന്നു പോകുന്നു. ശരീരത്തിന്റെയും മനസ്സിന്റെയും എന്നാൽ ബാക്കി ഭാഗം അവിടെത്തന്നെയുണ്ട്. മുറിഞ്ഞ ശരീരവും മനസ്സുമായി അവൾ അവിടെത്തന്നെയുണ്ട്. അവൾക്ക് വേദനയും യാതനയും ഉണ്ട്. കരുത്തും അതിജീവനശക്തിയും ഉണ്ട്. ഭാര്യക്കും അമ്മയ്ക്കും മുന്നിലെ സ്ത്രീയെ എൻറെ ഭർത്താവ് തിരിച്ചറിഞ്ഞില്ല. അതു പോലെ വീണ്ടും വീണ്ടും പീഡിപ്പിക്കപ്പെട്ട ഈ വിധവയുടെ മനസ്സിനെ നീ അറിയാൻ ശ്രമിച്ചി ല്ല'.എന്നിങ്ങനെ നോവലിസ്റ്റിനെ കുറ്റപ്പെടു ത്തുന്നു. അതിനു മറുപടിയായി തന്റെ ഉള്ളിലും ഒരു സോണിയ ഉണ്ടെന്ന് നോവലി സ്റ്റ് പറയുന്നു.'പല സ്ത്രീകളുടെയും ഉള്ളിൽ സോണിയ ഉണ്ടെന്നു തോന്നിയിട്ടുണ്ട്.  സത്യം ചില ഭാഗങ്ങൾ എഴുതുമ്പോൾ ഇത് ഞാനാ ണല്ലോ എന്ന തോന്നൽ എനിക്ക് ഉണ്ടായിട്ടു ണ്ട്'. എന്ന് നോവലിസ്റ്റ് പറയുമ്പോൾ അതി നു മറുപടിയായി സോണിയ ഇപ്രകാരം പറയുന്നു. 'പക്ഷേ നിൻറെ ഉള്ളിൽ എന്നോ ടൊപ്പം ഉണ്ടായിരുന്ന ലിയോ ടോൾസ്റ്റോയി ആണ് നിന്നെക്കൊണ്ട് അദ്ദേഹത്തിന്റെ മരണശേഷം കഥ നിർത്തിച്ചത്. ഭർത്താവ് പോയാൽ ഭാര്യ ഒന്നുമല്ല എന്ന ആൺ ചിന്ത, ആണഹന്ത. നീ എതിർക്കേണ്ട കഥയെഴുതു മ്പോൾ നീ പലപ്പോഴും അദ്ദേഹത്തോടുള്ള ആരാധനയിൽ നിന്നും അനുതാപത്തിൽ നിന്നും രക്ഷപ്പെടാൻ ശ്രമിക്കുന്നത് ഞാൻ കണ്ടിട്ടുണ്ട്'. സോണിയയ്ക്കും അദ്ദേഹ ത്തോട് കടുത്ത ആരാധന അല്ലായിരുന്നോ എന്ന നോവലിസ്റ്റിന്റെ ചോദ്യത്തിന് അവളുടെ മറുപടി ഇപ്രകാരമായിരുന്നു. 'ശരിയാണ്.പക്ഷേ എന്റേത് സ്വയം  മായ്ച്ചു കളയുന്ന വ്യക്തിത്വമായിരുന്നില്ല. അദ്ദേഹം എന്നെ അംഗീകരിക്കാത്തത് വലിയ വിഷമം ഉണ്ടാക്കിയിട്ടുണ്ട്.എത്ര തവണ പകർത്തി യും രഹസ്യ തിരുത്തലുകൾ വരുത്തിയും ഞാൻ അരിച്ചെടുത്തതാണ് അദ്ദേഹത്തി ൻറെ കൃതികൾ. എൻറെ കത്തുകളിലെയും ഡയറികളിലെയും കഥകളിലേയും എന്തിന് സംഭാഷണങ്ങളിലെ പോലും വാചകങ്ങൾ അദ്ദേഹം എടുത്ത് ഉപയോഗിച്ചിട്ടുണ്ട്. പക്ഷേ ഒരിടത്തും ഒരു അടിക്കുറിപ്പായി പോലും ഞാനില്ല. എഴുത്തുകാർ ഉൾപ്പെടെ പലരും എന്റെ സേവനങ്ങൾ പ്രകീർത്തിച്ചിട്ടുണ്ട്. എന്നാൽ പറയേണ്ട ആൾ മാത്രം ഒന്നും പറഞ്ഞില്ല. എൻറെ ഒരു കഷ്ടപ്പാടും അദ്ദേഹം പരിഗണിച്ചില്ല. എല്ലാം തനിക്ക് അവകാശപ്പെട്ടത് എന്ന മട്ടിലായിരുന്നു പെരുമാറ്റം. എന്നിട്ട് ആ കള്ളൻ  ചേർ ത്കോവിനെ പോലും എനിക്ക് മുകളിൽ പ്രതിഷ്ഠിച്ചു. അതൊക്കെയാണ് എന്നെ പ്രകോപിപ്പിച്ചത്'. വിശ്വ പൗരനോടൊപ്പം കഴിഞ്ഞ് 48 വർഷങ്ങളെ എൻറെ ജീവിത ത്തിലുള്ളൂവെന്ന് സ്ത്രീയായ നീയും കരുതി എന്ന് സോണിയ നോവലിസ്റ്റിനെ കുറ്റപ്പെടു ത്തുന്നു. ആ തെറ്റ് തിരുത്താമെന്ന് നോവലി സ്റ്റ് പറയുമ്പോൾ തൻറെ ജീവിതത്തിൽ നിന്ന് പഠിച്ച പാഠങ്ങളെ കുറിച്ച് സോണിയ നോവ ലിസ്റ്റിനോട് പറയുന്നു. നല്ല ദാമ്പത്യത്തിനു വേണ്ടത് പ്രസവിക്കുക, കുഞ്ഞുങ്ങളെ വളർത്തുക, വരവ് ചെലവിന്റെ കണക്കു നോക്കുക ,വീടിനെയും വൃദ്ധജനങ്ങളെയും പരിപാലിക്കുക, ഇതൊക്കെയാണ്.

            സോണിയുടെയും ടോൾസ്റ്റോ യുടെയും ലോക വീക്ഷണങ്ങൾ വ്യത്യ സ്തങ്ങളാണെന്ന് നോവലിസ്റ്റ് പറയുന്നു. 'ഏതൊരു സാധാരണ ഭാര്യയെയും പോലെ സോണിയ ഭർത്താവിനെയും കുട്ടികളെയും മാത്രം തൻറെ ലോകമായി കണ്ടു. അവർക്ക് വേണ്ടി ജീവിച്ചു. പക്ഷേ ടോൾസ്റ്റോയ്ക്ക് കുറച്ചുകൂടി വിശാലമായ ലോകവീക്ഷണം ആയിരുന്നു. അദ്ദേഹം അവശരുടെയും പീഡിതരുടെയും യാതനകൾ ഇല്ലാതാക്കാൻ ശ്രമിച്ചു. ആത്മീയ സ്ഥാപനങ്ങളുടെയും രാഷ്ട്രീയത്തിന്റെയും കാപട്യങ്ങൾ മനസ്സി ലാക്കി എതിർത്തു.സ്വന്തം കുടുംബത്തെ മാത്രം ലോകമായി കണ്ട സോണിയയ്ക്ക് അത് മനസ്സിലായില്ല'. അതിനു മറുപടിയായി സോണിയ പറയുന്നത് 'ഒരു ജീനിയസിന്റെ ഭാര്യയാവുക എന്നത് വലിയൊരു തലവിധി യാണ്.ആ ഭാരം ചുമക്കാൻ എൻറെ തളർന്ന ചുമലുകൾക്ക് കഴിവില്ലായിരുന്നു. പക്ഷേ എന്നെ ഭാര്യയാക്കിയ മഹാനായ എഴുത്തു കാരൻ അദ്ദേഹത്തിൻറെ ലോകവീക്ഷണ ത്തിലേക്ക് എന്തുകൊണ്ട് എന്നെ കൈപിടി ച്ചുയർത്തിയില്ല'. അതിനു ഉത്തരവും സോണിയ പറയുന്നുണ്ട്.'ക്ഷാമബാധിതരെ സഹായിക്കാനായി ഞാനെൻറെ ഭാഷയിൽ ഒരു സഹായഭ്യർത്ഥന എഴുതി പ്രസിദ്ധീക രിച്ചു. അത് റഷ്യയിലെ മാത്രമല്ല ലോകത്തി ലെ മുഴുവൻ പത്രങ്ങളും ഏറ്റെടുത്തു പ്രതീക്ഷിച്ചതിനേക്കാൾ കൂടുതൽ പണം ലോകത്തിന്റെ പല ഭാഗത്തുനിന്നും ഒഴുകി വന്നു. പക്ഷേ അത് ഇഷ്ടപ്പെടാത്ത ഒരാൾ ഉണ്ടായിരുന്നു  ലിയോ ടോൾസ്റ്റോയ്. അദ്ദേ ഹത്തിൻറെ ആണഹന്ത. തന്നെക്കാൾ തൻറെ ഭാര്യ വളരുമോ എന്ന പേടി അതാണ് അദ്ദേഹം എന്നെ ഭോഗവസ്തുവായി മാത്രം കണ്ടതും വീടിൻറെ കടമകളിൽ എന്നെ തളച്ചിട്ടതും.വിശാലമായ ലോകവീക്ഷണ ത്തിൽ നിന്ന് എന്നെ തടഞ്ഞു വെച്ചതും. മറ്റുള്ളവരുടെ എല്ലാ ആവശ്യങ്ങൾക്കും ഓടിച്ചെല്ലുകയും സഹായിക്കുകയും ചെയ്യുന്ന ദൈവദൂതന് ഭാര്യ വളരുന്നത് ഇഷ്ടമായിരുന്നില്ല.സ്നേഹസമ്പന്നനായ ഭർത്താവായിരുന്നു അദ്ദേഹം. പക്ഷേ ഭാര്യ താൻ വരയ്ക്കുന്ന വരയ്ക്കപ്പുറം പോകരു ത്.  എൻറെ പല സുഹൃത്തുക്കളുടെയും ജീവിതം എന്റേതുപോലെ തന്നെയായിരുന്നു. മഹാന്മാരൊക്കെ അങ്ങനെ ആയിരിക്കാം. അവർ ചെയ്ത നന്മകളിൽ അവരെന്നും ജീവിക്കും. അവരുടെ ഭാര്യമാർ എങ്ങനെ ജീവിച്ചു എന്നറിയാൻ താല്പര്യമുള്ളവർ കുറവ്'.

           സോഫിയയുടെ അവസാനകാലവും നോവലിൽ വളരെ വൈകാരികമായി ചിത്രീകരിക്കുന്നു. മരണശയ്യയിൽ കിടന്ന് അവൾ മക്കളോട് ഇങ്ങനെ പറയുന്നു. 'നിങ്ങളോട് ഒരു കാര്യം പറയാനുണ്ട് മക്കളെ, അദ്ദേഹത്തെ അല്ലാതെ മറ്റാരെയും ഞാൻ സ്നേഹിച്ചിട്ടില്ല'. തുടർന്ന് സോഫിയ  മരണ ത്തിലേക്ക് നീങ്ങുന്നു. മരണശേഷം അവരെ മരിച്ചുപോയ മക്കളുടെ ശവകുടീരങ്ങൾ ക്കൊപ്പം ആണ് കിടത്തിയത്. ടോൾസ്റ്റോ യ്ക്കൊപ്പം അല്ല. 'വിശ്വപൗരന്മാർ വിശ്വത്തി നുള്ളതാണ്. ഭാര്യമാരുടെ സ്വകാര്യ ആവശ്യ ങ്ങൾക്ക് അവിടെ പ്രസക്തിയില്ല'. ഭർത്താവി നും കുട്ടികൾക്കും കുടുംബത്തിനും വേണ്ടി ഉരുകി തീർന്ന ഒരു ജീവിതം അവിടെ അവ സാനിക്കുന്നു.

         പുഴ പോലെ ഒഴുകി നടക്കാൻ കൊതിച്ച ഒരു സ്ത്രീയുടെ ജീവിതം ടോൾ സ്റ്റോയിയുടെ ലോകവീക്ഷണങ്ങൾക്കും കുടുംബജീവിത ത്തിലെ പരിമിതികൾക്കുമിടയിൽ തടഞ്ഞു നിൽക്കുന്ന അവസ്ഥയാണ് ഈ നോവൽ വരച്ചു കാട്ടുന്നത്. നോവൽ ശീർഷകത്തിലെ 'പുഴ' ജീവിതത്തിന്റെയും സ്വാതന്ത്ര്യത്തി ന്റെയും വികാരത്തിൻറെയും പ്രതീകമാണ്. ‘ഒഴുകാതെ’ എന്നത് ജീവിതത്തിൻറെ നിശ്ചലതയെയും സ്വാതന്ത്ര്യ നഷ്ടത്തെയും സൂചിപ്പിക്കുന്നു. സോഫിയ എന്ന ഒഴുകാത്ത പുഴയുടെ ഒച്ചകളാണ് ഈ നോവലിലൂടെ മുഴങ്ങി കേൾക്കുന്നത്.

ഗ്രന്ഥസൂചി 

ചന്ദ്രമതി, ഒഴുകാതെ ഒരു പുഴ, മാതൃഭൂമി ബുക്സ്, കോഴിക്കോട്,2025.

ഡോ.ലാലു വി.

അസോസിയേറ്റ് പ്രൊഫസർ

മലയാള വിഭാഗം

യൂണിവേഴ്സിറ്റി കോളേജ്

തിരുവനന്തപുരം.